Յունուար 16-ին  Պոսթընի հայ մշակոյթի եւ կրթական կեդրոնի «Հրայր եւ Աննա Յովնանեան» սրահին մէջ ցուցադրուեցաւ այդքան սպասուած «Կեանք ու կռիւ» ֆիլմը (հայերէն, անգլերէն ենթագրերով):

ՀՀ անկախութեան 25-ամեակին նուիրուած «Կեանք ու կռիւ» ֆիլմի բերմադրիչն ու սենարիստը Մհեր Մկրտչեանն է, վաւերագրող բեմադրիչը` Էդուարդ Համբարձումեանը, բեմադրող տնօրէնը` Վահագն Տէր-Յակոբեանը: Ֆիլմին դէպքերը, որոնք կը ներկայացնեն սիրոյ եւ հայրենասիրութեան հրաշալի  պատմութիւն մը, տեղի կ´ունենան Արցախեան պատերազմի տարիներուն եւ Երեւանի մէջ` 90-ականներու սկիզբը:

Ֆիլմն ինչպէս Հայաստանի, այնպէս ալ Ամերիկայի մէջ, յաջողութեամբ ցուցադրուած եւ կը շարունակուի  ցուցադրուիլ: «Արդէն 3 ամիս է` կը ցուցադրուի Լոս-Անճելըսի մէջ, մէկ օր ցուցադրուած է Նիւ Եորքի, Ուաշինկթընի, Պոսթընի մէջ, կը ցուցադրուի նաեւ Նիւ
ճըրսիի եւ Ֆիլատելֆիոյ թատրոններուն մէջ,- մեր զրոյցի ժամանակ ըսաւ Սամուէլ Յովհաննիսեան (ֆիլմի ներկայացուցիչը  Ամերիկայի մէջ):

Պատահական չէ, որ «Անահիտ» մրցանակաբաշխութեան ֆիլմը ներկայացուած էր 8 անուանակարգերու մէջ եւ «Անահիտ» մրցանակ ստացաւ` որպէս լաւագոյն խաղարկային ֆիլմ, լաւագոյն բեմադրող (Վահագն Տէր-Յակոբեան), լաւագոյն դերասան (Սամուէլ Թադեւոսեան):

Ֆիլմն այնքան բնական ու համահունչ է, որ հանդիսատեսն իրմէ անկախ  կը վերապրի  ցուրտ ու մութ տարիներու ծանր օրերը: Միաժամանակ յուզմունքով, բայց  հարազատ ջերմութեամբ  մը հանդիսատեսը կը «ճանապարհորդէ»  հերոսին` Տիգրանին հետ: Ականատես կ´ըլլայ, թէ ինչպէս  ազնիւ ու ամչկոտ պատանին կը վերածուի Արցախեան պատերազմի քաջ զինուորի, կ´ապրի անոր  հետ միասին ցաւ ու ափսոսանք, սէր ու յուզմունք:

Միակ բանը, որ կը խորհիս ֆիլմին աւարտէն ետք` կրկին նայելու ցանկութիւնն է, հայերու հետ յաճախ շփուելու, հայկականը պահպանելու գիտակցութիւնն  է  յատկապէս օտար ափերու վրայ:

Տօն է այսօր հոգիիս համար, բացի ֆիլմէն, հնարաւորութիւն ունեցայ  ծանօթանալու Պոսթընի հայ մշակոյթի եւ կրթական կեդրոնին մէջ կամաւոր  աշխատող կիրթ ու համեստ  հայրենակիցներուս` Թաթուլ Պատալեանի (երգիչ Յովհաննէս Պատալեանի եղբօրորդին), Արա Սարգսեանի, Մարտին Յարութիւնեանի, Սամուէլ Յովհաննիսեանի հետ: Առնչուած անոնց հայապահպան գործունէութեանն  ու  ընթացիկ խնդիրներուն, այցելել դպրոցի հայոց լեզուի դասարանը:

Եւ այսպէս կը շարունակուի կեանքը եւ, դժբախտաբար, կռիւը:

Անհամբեր կը սպասենք «Կեանք ու կռիւ» ֆիլմի 2–րդ  մասի ցուցադրութիւնը:

Ամալիա Իսայեան, ԱՄՆ

Աղբիւրը` «Հայերն այսօր»