Մոսկուայի «Հայորդաց տան» սաներուն Ճիւտօ մարզաձեւին կը ծանօթացնէ սամպօ եւ ճիւտօ մարզաձեւերուն մէջ Հայաստանը Եւրոպայի եւ Աշխարհի առաջնութիւններուն ներկայացուցած մարզիկ Հայկ Մուղնեցեանը:

Ինչպէս «Հայերն այսօր»-ին կը յայտնեն «Հայորդաց տան» տեղեկատուական կեդրոնէն` ան մարզական կեանքը սկսած է Մոսկուայի մէջ, իսկ որոշ ժամանակ մարզուած է նաեւ Հայաստանի մէջ եւ ներկայացուցած մեր երկիրը: Աւելի ուշ, հանգամանքներու բերումով, դադրած է մարզուելէ եւ կը զբաղի մարզչական գործունէութեամբ:

Հայկ Մուղնեցեանի ղեկավարած ճիւտոյի խմբակին մէջ այս պահուն կը մարզուի տաս սան, որոնցմէ ամենակրտսերը 5 տարեկան է:

«Ճիւտոյով զբաղուելու համար ամենալաւ տարիքը 10-11 տարեկանն է, որպէսզի մարզիկը չհասցնէ յոգնիլ մարզաձեւէն եւ 4-5 տարի պարապելէ յետոյ մասնակցի մրցումներու:Քանի որ «Հայորդաց տան» մէջ միայն մէկ  օր կը պարապինք, ատոր համար ծնողներէն շատերուն կը յորդորեմ երեխաներուն մարզական դպրոց տանիլ: Եթէ անգամ անոնք չցանկան ճիւտոյով զբաղուիլ, միեւնոյնն է հեշտութեամբ կրնան փոխել մարզաձեւը: Ճիւտոյի մէջ ձեռք բերած ճկունութիւնը ատիկա  թոյլ  կու տայ անոնց»,- մեզի հետ զրոյցին ըսաւ մարզիչը:

9-ամեայ Վիլեն Աթոյեան 6 տարեկանէն կը մարզուի Հայկ Մուղնեցեանի մօտ եւ աւելի քան մէկ տարի շաբաթական երեք անգամ դասերու կ’երթայ  մարզական դպրոցի խմբակին մէջ: Այն հարցին, թէ մարզական դպրոցին մէջ կանոնաւոր պարապելէ յետոյ իրենց կը բերէ «Հայորդաց տան» Ճիւտոյի խմբակ` Վիլեն պատասխանեց․ «Ես Ճիւտոյի կ’երթամ, որ ուժեղ ըլլամ ու կարենամ ինքզինքս պաշտպանել: Երկու մարզիչներն ալ շատ կը տանջեն, բայց Հայկը առաւել մանրամասնութեամբ կը բացատրէ: Ան մեզի կը սորվեցնէ, որ Ճիւտոն ոչ միայն ուժ, այլեւ խելք է ու որ պէտք  է կազմակերպուած ըլլալ: Ես եւ կրտսեր եղբայրս` Տիգրանը, շատ կը սիրենք մեր մարզիչը: Ան միշտ մեզմէ առաւելագոյնը կը պահանջէ»:

Վիլենի եւ Տիգրանի մայրը` Աննա Թումանեանն ալ նշեց, որ իւրաքանչիւր պարապմունքէ տղաները կը վերադառնան նոր բան սորված եւ ոգեւորուած: «Երեխաներս շատ կը սիրեն Հայկին, շատ խստապահանջ է: Վիլենս կ’ըսէ որ Հայկի մէկ պարապմունքը հաւասարազօր է մարզական դպրոցի երեք օրուան պարապմունքին: Հայկը շատ արհեստավարժ է եւ կեանքի դասեր ալ կու տայ երեխաներուն: Տիգրանս աշխատող չէ, բայց երկուքն ալ շատ կը սիրեն մարզիչին եւ այդ պատճառով սիրով կու գան մարզումներուն: Կ’ուզեմ նշել, որ երբ Վիլենը տարինք մարզական դպրոց` նոր մարզիչը զգաց անոր ֆիզիկական պատրաստուածութիւնը եւ մանրամասնօրէն հետաքրքրուեցաւ, թէ ով է մարզիչը, ուր կը  պարապի»,- մեզի հետ զրոյցին աւելցուց Աննա Թումանեան:

Ճիւտոյի խմբակ յաճախող սաները տարուան վերջը ցուցադրական մարզումներ, մրցոյթներ կ’իրականացնեն, որուն նպատակը երեխաներուն շահագրգռելն է:

Այն հարցին, թէ ինչ կարեւորագոյն խորհորդներ կու տայ իր մարզիկներուն` Հայկ Մուղնեցեան պատասխանեց․ «Իրենց խորհուրդ կու տամ չվախնալ, բայց եւ այնպէս չընել, որ վախի բացակայութիւնը դառնայ նախայարձակ ըլլալու պատճառ: Ու որ ամենակարեւորն է`  իւրաքանչիւր իրավիճակի մէջ հանգիստ ըլլան, քանի որ մարմինն ու միտքն երբ հանգիստ ըլլան  ճիշդ որոշումներ կայացելու հնարաւորութիւն կու տան»: