Լիբանանահայ Ընտանիքը Մտադիր է Հայաստանի Մէջ Սրբիչներու, Անձեռոցներու Արտադրութիւն Հիմնել

Լիբանանահայ ներդրողները կը ցանկան Հայաստանի մէջ տնային հիւսուածքի (home textile)` սրբիչներու, անձեռոցի արտադրութիւն հիմնել: ՀՀ տնտեսական զարգացման եւ ներդրումներու նախարար Սուրէն Կարայեան Յունուար 27-ին, հանդիպած է լիբանանահայ Նազարեաններու ընտանիքին հետ:

ՀՀ տնտեսական զարգացման եւ ներդրումներու նախարարութիւնը կը յայտնէ, որ ընկերութիւնը այս ոլորտին մէջ գործունէութեան հարուստ փորձ ունի տարբեր երկիրներու մէջ: Գործարարները նախարարին ներկայացուցած են իրենց յետագայ ծրագիրները:

Նազարեանները Սուրէն Կարայեանի հետ քննարկած են նաեւ հարկային, մաքսային, հումքի ներմուծման հետ կապուած խնդիրները: Նախարար Սուրէն Կարայեան վստահեցուցած է գործարարներուն, որ պետութիւնը աջակցութեան իր ողջ գործիքակազմով գործարարներուն կողքին է եւ պիտի օգնէ լուծել իրենց առջեւ ծառացած խնդիրները: Սուրէն Կարայեան յոյս յայտնած է, որ ընկերութիւնը հնարաւորութեան չափով շուտ պիտի գործարկէ արտադրութիւնը:

Գործարարները նշած են, որ կը ծրագրեն արտադրութիւնը հիմնել եւ սկսիլ 2017 թուականին:

Scroll Up