Երրորդ գիրքը հետաքրքրական եւ իր տեսակին մէջ իւրայատուկ հանրագիտարան մը, որուն հեղինակն է Լիոնաբնակ ընկ. Արման Շերեֆ, դարձեալ   ներկայացուց Ընկ. Սեւակ Յակոբեան, այս անգամ սահիկներու միջոցաւ:

Իր   իւրօրինակ   գիրքով   Արմանը   Հայ   Ժողովուրդի   ամբողջ   պատմութիւնը`   եղափոխութիւնը (evolution) ներկայացուցած է խորհրդանիշերու (symbols) միջոցով:

Իր անձնական հաւաքածոյին մաս կազմող անթիք իրեր,   մետաղադրամներ, նամականիշեր եւ փաստանիւթային հնութիւն ներառող ամբողջ հանրագիտարանային հատոր մը պատրաստած է Արմանը` 356 էջով: Նամականիշերու եւ այլ վաւերագրերու պատկերներուն ան կցած է ծանօթագրութիւններ,  ուր տրուած  են անոնց  ստեղծման  կամ  ի յայտ  գալուն,  ինչպէս  նաեւ  բուն նիւթին մասին պատմութիւններ:  Այսինքն փոխանակ Հայոց Պատմութիւնը երկարօրէն պատմելու, ան առած է պատմական անձնաւորութեան  մը կամ դէպքի մը վերաբերող դրոշմաթուղթը  եւ կամ անոր փաստատուղթը ու անոր նկարին կցած է բացատրողական մը կարճ պարբերութեամբ` անգլերէն եւ ֆրանսերէն լեզուներով, մատչելի` հայախօս հայերուն կողքին նաեւ  հայերէն լեզուին անծանօթ հայերուն եւ թէ՛ օտարներուն, այս ձեւով ստեղծելով իւրայատուկ, շատ հետաքրքրական եւ մանաւանդ բոլորին հասանելի ոճով Հայոց Պատմութեան գիրք մը, որ ՌԱԿ ՄԱՏԵՆԱՇԱՐԻ հովանին վայելող հրատարակութիւններուն մաս պիտի կազմէ շատ շուտով:

Հրատարակելի   առաջին   գիրքերուն   ներկայացումին   եւ   ընդհանրապէս   ՌԱԿ   ՄԱՏԵՆԱՇԱՐԻ ծրագրին  ու  անոր  մեկնարկումի  յայտարարութեան  լոյսին  տակ,  ներկաները  ունեցան հետաքրքրական  եւ  շահաւետ  հարցադրումներ,  որոնց  շարքին  էր  նաեւ  հանրածանօթ մտաւորական   եւ   հրապարակագիր   Տոքթ.   Թորոս   Թորանեան,   որ   քաջալերական   խօսքերով ողջունեց ՌԱԿ ՄԱՏԵՆԱՇԱՐԻ հիմնադրութիւնը եւ յարատեւութիւն մաղթեց անոր ծրագիրներուն:

Աւարտին  յիշենք,  թէ  ՌԱԿ  Կեդրոնական Վարչութեան հովանին վայելող ՌԱԿ ՄԱՏԵՆԱՇԱՐ- ը տնօրինող գրական եւ նիւթական յանձնախումբին շուտով  մաս  պիտի  կազմեն՝  Սփիւռքի  բոլոր ափերուն մէջ ապրող մտաւորականներ եւ բարերարներ` զանազան լեզուներով թէ՛ գիրքի եւ թէ՛ ելեկտրոնային ձեւով գրուած ու պատրաստուած լաւագոյնն ու պիտանին հրատարակելու եւ տարածելու ամէնուրեք` օգտակար հանդիսանալով Հայ եւ հայասէր հեղինակներուն տարածելու իրենց մտքին արգասիքը հանդիսացող աշխատանքները: Վերջապէս  նշենք,  թէ  լիբանանեան  ՙFuture՚ հեռատեսիլի կայանին հայերէն լուրերու բաժինը յատուկ  պատրաստուած  հաղորդագրութիւն  մը սփռեց ՌԱԿ ՄԱՏԵՆԱՇԱՐ-ի մեկնարկումին մասին:

ՏԵՂԵԿԱՏՈՒԱԿԱՆ  ԳՐԱՍԵՆԵԱԿ ՌԱԿ ԿԵԴՐՈՆԱԿԱՆ  ՎԱՐՉՈՒԹԵԱՆ

Ռամկավար  Մամուլ