Թուրքիոյ Քայսերու (պատմական Կեսարիա) քաղաքին մօտ 40 տարի որպէս մարզական կեդրոն ծառայած հայկական Սուրբ Աստուածածին եկեղեցւոյ վերակառուցման ընթացքին փակցուած ցուցապաստառին վրայ «Եկեղեցի» գրութիւնը քաղաքացիներու զայրոյթի պատճառ դարձած է:

Այս մասին ինչպէս կը տեղեկացնէ «Ակօս» պարբերականը, «Եկեղեցւոյ վերակառուցման աշխատանքներ» ցուցապաստառի դէմ հնչած քննադատութիւններէն ետք ցուցանակը
փոխուած է եւ տեղադրուած է «Մշակոյթի եւ արուեստի կեդրոնի շինարարութիւն» գրութիւնը:

Եկեղեցին մօտ 40 տարի ծառայած է որպէս մարզական  ձեռնարկներու վայր: Քայսերի բնակիչները տեղի ունեցածը կը կապեն վարչապետ Ռեճէպ Թայիպ Էրտողանի վերջին յայտարարութեան հետ այն մասին, որ ճանապարհ կառուցելու համար, եթէ հարկ ըլլայ, մզկիթ ալ կը քանդեն:

«Ակօս»-ի հետ զրոյցի ընթացքին Քայսերի քաղաքապետարանի ներկայացուցիչը տեղեկացուցած է, որ ներկայիս քաղաքին մէջ կը վերակառուցուի 20 պատմական շինութիւն, եւ տարիներ շարունակ որպէս մարզական կեդրոն ծառայած Սուրբ Աստուածածին եկեղեցին պիտի վերածուի ցուցասրահի:

Ան նշած է, որ  քանի  եկեղեցին հայկական ճարտարապետութեան նմուշ է, վերակառուցման համար հայ ճարտարապետի հետ պիտի համագործակցին: Պիտի վերակառուցուի նաեւ դեռեւս գործող Սուրբ Գրիգոր Լուսաւորիչ եկեղեցին:

Պաշտօնեան յայտարարած է, որ առաջին պաստառը պարզապէս իրենց ցուցանիշներուն չէր համապատասխաներ եւ փոխուած է միայն այդ պատճառով:

http://www.tert.am