Նոր Ջուղայի թատրոնի հիմնադրման 130-ամեակի յոբելենական  յանձախումբի նախաձեռնութեամբ` Դեկտեմբեր 8-ին Նոր Ջուղայի Հայոց ազգ. կրթահամալիրի «Ալենուշ Տէրեան» սրահին մէջ, Հայաստանի «Ովասիս» մնջախաղաի թատերախումբը,  բեմադրութեամբ Ռոբերտ Ծատուրեանի, հանդէս եկաւ   Շեքսփիրի «Լիր արքայ» թատերգութեամբ:

Ինչպէս Իրանէն «Հայերն այսօր»–ին կը տեղեկացնէ Երանուշ Թահմազեան` հանդիսատեսին ողջունեց    յոբելենական յանձնախումբի  նախագահ Նիկիտ Միրզայեանսը եւ հրաւիրեց մէկ վայրկեան լռութեամբ յարգել 1988-թ. Դեկտեմբեր 7-ին Հայաստանի մէջ տեղի ունեցած երկրաշարժի հետեւանքով զոհուածներու յիշատակը, ապա հակիրճ կերպով  անդրադարձաւ 130-տարի առաջ   Բեգլար Աղայեանի  ջանքերուն շնորհիւ հիմք դրուած Նոր Ջուղայի թատրոնի պատմականին եւ գեղեցիկ զուգադիպութիւն համարեց  այն, որ յոբելենական ձեռնարկներու մեկնարկը տրուած է  Բ. Աղայեանի թոռնիկին` Իրանի առաջին կին ֆիզիքոս  եւ աստղագիտութեան մայր կոչումին արժանացած  «Ալենուշ Տէրեան»-ի  անուան  դահլիճին մէջ, այնուհետեւ   տեղեկութիւններ փոխանցեց «Ովազիս» թատերախումբի եւ   Իրան գտնուելու անոր առաքելութեան մասին:

 Շնորհալի դերասաններու   մասնակցութեամբ  բարձր մակարդակի վրայ իրականացուած ներկայացումէն ետք`  Սպահանի Հայոց թեմի կաթողիկոսական փոխանորդ` Տ. Սիփան ծ.վրդ. Քեչեճեան հանդէս եկաւ գնահատանքի եւ քաջալերանքի խօսքերով` ուղղուած բեմադրիչին եւ դերասաններուն, որոնք  մնջախաղի ներկայացմամբ յաջողեցան կատարեալ կերպով փոխանցել թատերգութեան հիմքին ինկած պատգամը: Վերջինս նաեւ գնահատանքի խօսք ըսաւ յոբելենական յանձնախումբին` ներկայացումը կազմակերպելու  եւ Նոր Ջուղայի «Լեւոն Շանթ» թատերախումբին` կազմակերպչական աշխատանքներուն համագործակցութիւն ցուցաբերելու առումով:

Յաջորդիւ  ազգային  իշխանութիւնը, ձեռամբ Հայր Քեչեճեանի, պարգեւատրեց թատերախումբի անձնակազմն ու խումբին ընկերակցող Անդրանիկ Խեչումեանը:

Յատկանշելի է, որ   Սպահանի Հայոց թեմի Պատգամաւորական ժողովի որոշմամբ 2017 թուականը յայտարարուած է  Նոր Ջուղայի թատրոնի  տարի, եւ յոբելենական ձեռնարկներու աշխատանքները համակարգելու համար կեանքի կոչած է  Յոբելենական յանձնախումբ:

 Յիշեցնենք, որ «Ովասիս» թատերախումբը Իրան  ժամանած էր մասնակցելու  2016 թ. Դեկտեմբեր 2-7- Սպահան քաղաքին մէջ «Օմիտ աֆարին» խորագիրի ներքոյ կայացած` ֆիզիքական սահմանափակումներ  ունեցող թատրոնի միջազգային 4-րդ փառատօնին: Ներկայացման անդրանիկ ելոյթը տեղի  ունեցած է Դեկտեմբեր 5-ին`  պարսկական «Ֆարշչիան» դահլիճին մէջ, ուր  բացի փառատօնի մասնակիցներէն ներկայ  եղած են  հոծ թիւով  հանդիսատես, ներառեալ` Նոր Ջուղայի «Լեւոն Շանթ» թատերախումբի անձնակազմն ու հայ համայնքի այլ  ներկայացուցիչները: Փառատօնի լսողական սահմանափակում ունեցող բաժինին մէջ իրաւարար կազմի գնահատմամբ` «Լաւագոյն դերասան» անուանակարգին մէջ  Սարգիս Սարգսեան շահած է առաջին  մրցանակը, «Լաւագոյն դերասանուհի» անուանակարգին մէջ Մերի Ծատուրեան` երկրորդ, իսկ «Զգեստներու  ձեւաւորում» անուանակարգին մէջ Ռոբերտ Ծատուրեան գրաւած է երրորդ տեղը: «Ովասիս թատերախումբը արժանացած է հանդիսատեսի յոտընկայս ծափերուն:

Թատերախումբը կը ներկայացնէին`

Ռոբերտ Ծատուրեան` բեմադրիչ եւ  Լիր արքայի  դերակատար

Մերի Ծատուրեան` Քորտելա (Լիր արքայի դուստր)

Սէրին Քերիմեան` Ռեկան (Լիր արքայի դուստր)

Շուշան Սահակեան` Կոներիլ (Լիր արքայի դուստր)

Մերի Ղազարեան` ճգնաւոր

Կարէն Եսայեան` Ալպանիի մարզպետ

Արտակ Յակոբեան` Քոռնոյէի մարզպետ

Սարգիս Սարգսեան` ծաղրածու

Սամուէլ Յովհաննիսեան` Ֆրանսայի իշխան

 Լուսանկարները` հեղինակին