ՀՀ մշակոյթի նախարար Արմէն Ամիրեան նշանակման օրուընէ հանդէս կու գայ գրասէր հասարակութիւնը ոգեւորող  շարք մը նախագիծերով: Հէնց այսօր բեմադրիչ Արտաւազդ Փելեշեան եւ ՀՀ մշակոյթի նախարար Արմէն Ամիրեան համաձայնագիր ստորագրեցին` Փելեշեանի «Իմ աշխարհը եւ դաշտի միասնական տեսութիւնը» գիրքի հրատարակութեան շուրջ:

«Ժամանակակից գրականութեան հարցում վերանայել ենք պետական քաղաքականութիւնը: Առաջիկայում աջակցութիւնը կը նպատակաուղղենք հեղինակների հանրահռչակման ծրագրերին: Նաեւ յատուկ դրամաշնորհներ ենք տրամադրելու հայ ժամանակակից գրողների թարգմանութիւնները հրատարակող օտարերկրեայ հրատարակիչներին,:

Չափազանց կարեւոր է շուկայի ուսումնասիրութիւնը, որը պէտք է պարզի ներքին, արտաքին, ինչպէս նաեւ Սփիւռքի պահանջները եւ պետական կարիքները: Այդ ուսումնասիրութիւնը պէտք է ծառայի եւ′ մշակոյթի նախարարութեանը, եւ′ մասնաւոր հրատարակիչներին` առաւել ճիշտ կողմնորոշուելու գրահրատարակչական շուկայում: Դա արդիւնքում կ’օգնի նաեւ տաղանդաւոր հեղինակներին, այդ թւում` երիտասարդ:

Ինչ վերաբերում է պետական պատուէրով հրատարակութիւններին, ապա երկրորդում ենք Ձեզ, որ ժամանակակից երիտասարդ տաղանդաւոր գրողները միւսների հետ նաեւ 100 տոկոս պետական աջակցութեամբ հնարաւորութիւն են ունենալու տպագրելու իրենց գրքերը, որոնք մեր գրադարանների միջոցով կը բաժանենք հանրապետութեան բոլոր գրադարաններին, ՀՀ դեսպանատներին, Սփիւռքի հայկական կառոյցներին, մշակութային կենտրոններին, դպրոցներին: Կազմակերպելու ենք շնորհանդէսներ, հեռուստառատիոհաղորդումներ, ժամանակակից գրողների գրական մրցանակաբաշխութիւն եւ այլն:

Գրահրատարակչական գործառոյթի մէջ աւելացրել ենք սահմանափակ կարողութիւններով մարդկանց համար գրքերի հրատարակութիւնը, մասնաւորապէս` կոյրերի» ,- կը նշէ նախարարը: Կը  յայտնէ wnews.am-ը: