Հինգշաբթի` Նոյեմբեր 10-ին, Ն. Ջ. Հայ Մ.Մ. «Արարատ» միութեան մարզասրահին մէջ կայացաւ դպրոցական պասքեթպոլի մրցաշար`   նուիրուած Նոր Ջուղայի Հայոց ազգ. «Քանանեան»  իգական եւ  «Կատարինեան» արական միջնակարգ (աւագ) դպրոցներու հիմնադիր բարերարներու յիշատակին:

Ինչպէս Իրանէն «Հայերն այսօր»-ին կը յայտնէ Երանուշ Թահմազեան` նախաձեռնութիւնը զոյգ դպրոցներու տեսչութեանն էր, որուն կազմակերպման համար իրենց սերտ համագործակցութիւնը  բերած էին Ծնողական խորհուրդները, Ն. Ջ. Հայ Մ.Մ. «Արարարտ» միութեան կեդրոնական վարչութիւնը եւ Մարզական միաւորը: Մրցաշարը իր խրախուսական ներկայութեամբ պատուած էր  Շահինշահր քաղաքի հոգեւոր տեսուչ Տ.Անանիա ծ.վրդ. Գուջանեան: Մրցաշարը կայացաւ  աշակերտութենէն կազմուած` «Արցախ»,  «Արքա», «Բազէ» եւ «Սպարտակ»  խումբերուն միջեւ, որոնցմէ  ամենաշատ միաւոր հաւաքած «Արցախ» եւ «Արքա» խումբերը մրցեցան եզրափակիչ փուլին: Լարուած մրցակցութեան արդիւնքով յաղթող ճանչցուեցաւ «Արցախ» խումբը եւ պարգեւատրուեցաւ, իսկ  բոլոր մասնակիցներուն շնորհուեցաւ յուշանուէրներ:

Նշելի է, որ իւրաքանչիւր խումբ կ’ընդգրկէր աղջիկ եւ տղայ, որ խաղերը դարձուցած էր աւելի հետաքրքիր: Առաւել հետաքրքիր էր այն, որ տղաները  ֆիզիքապէս  ըլլալով  աւելի զօրեղ, խաղերուն ընթացքին զգուշաւոր էին աղջիկներուն նկատմամբ` ասպետական վերաբերմունք ցուցաբերելով, որ  «Քանանեան» դպրոցի փոխտեսուչ Ռիմա Սիմոնեան եւ Հայր Անանիա Գուջանեան իրենց խօսքերուն մէջ բարձր գնահատեցին: Շնորհակալական խօսք ուղղեցին նաեւ մրցավարներուն, իրաւարար կազմին, բուժքրոջը, ծնողական եւ աշակերտական խորհուրդներուն, խաղերը իրականացման գործին աջակցող անձանց: Գերպ. Հայր Սուրբը իր խօսքի շարունակութեան մէջ յոյս յայտնեց, որ  սկիզբ դրուած այս  գեղեցիկ խաղերը ըլլան շարունակական, նաեւ կարեւոր համարեց իրար սիրելու եւ յարգելու գաղափարը, որն ակնյայտ էր խաղերուն ընթացքին: Այդ առումով յատուկ շնորհակալական խօսք ուղղեց զոյգ դպրոցներու պատասխանատուներ` Ռիմա Սիմոնեանին եւ Ռուբէն Խաչիկ Գրիգորեանին:

Լուսանկարները` հեղինակի