Թէեւ աւելի քան 100 տարի է, որ ապխազահայերը պատմական հայրենիքի մէջ չեն ապրիր, այնուամենայնիւ կը պահպանեն հայկական աւանդոյթներն ու ազգային ինքնութիւնը:

42-հազարանոց հայ համայնքը աւելի քան մէկ դար է` կը բնակի Ապխազիոյ մէջ, բայց այնքան ընդելուզուած է տեղի բնակչութեան հետ, որ Սուխումի բոլոր պետական եւ հասարակական կառոյցներուն մէջ հայեր կան, կը գրէ armeniasputnik.am կայքը:

Դպրոց եւ կենցաղ

«Ապխազիոյ մէջ մենք լաւ կ’ապրինք, այստեղ հայկական 27 դպրոց կը գործէ, մեր երեխաները հայերէն կը սորվին: Այս հարցով մեզ կ’օգնեն Հայաստանէն բերուած դասագիրքերը», — Sputnik Արմէնիա մամուլի կեդրոնին մէջ կայացած տեսակապի ժամանակ ըսաւ Ապխազիոյ հայերու միութեան նախագահ Գալուստ Տրապիզոնեան: Անոր խօսքով` այս տարուընէ Ապխազիոյ պետական համալսարանին մէջ մանկավարժական բաժանմունք  բացուած է, ուր 13 հայ ուսանող ընդունուած է: Ատիկա կարեւոր իրադարձութիւն է  ապխազահայերու համար, քանի որ հայկական դպրոցներուն մէջ երիտասարդ կազմի կարիքը կայ:

Ապխազիոյ Հանրապետութեան հանրային պալատի անդամ Խաչիկ Մինոսեան մեծ ձեռքբերում կը համարէ այն, որ Ապխազիոյ սահմանադրութիւնը մայրենիով կրթութիւն ստանալու հնարաւորութիւն կու տայ հայերուն: Հայ մասնագէտներու խումբ մը պարբերաբար կը ժամանէ Հայաստան ուսուցիչներու որակաւորման մակարդակը բարձրացնելու համար: Ապխազիոյ հայկական կառոյցներու ներկայացուցիչները միաձայն կը վստահեցնեն, որ վերջին տարիներուն դրական ուժ կը նկատուի տեղի համայնքի եւ պատմական հայրենիքի փոխգործակցութեան հարցին մէջ:

«Ամէն տարի բազմաթիւ երեխաներ Ապխազիայէն Հայաստան կը ժամանեն ՀՀ սփիւռքի նախարարութեան «Արի տուն» ծրագիրին շնորհիւ: Այս տարի մեր երեխաները մասնակցած են «Իմ Հայաստան» փառատօնին»,- ըսաւ Մինոսեան:

Հայերը Ապխազիոյ պետական համակարգին մէջ

Հայկական համայնքի շատ ներկայացուցիչներ կ’աշխատին Սուխումի եւ Ապխազիոյ միւս քաղաքներուն ու շրջաններու պետական կառոյցներուն մէջ: Մինչեւ վերջերս Ապխազիոյ փոխվարչապետը հայ էր, հասարակական հարցերու նախարարը` Սուրէն Քերսելեանը: Այժմ Ապխազիոյ արտակարգ իրավիճակներու առաջին փոխնախարարը գնդապետ Տիգրան Դիղբալթեանն է, գիւղատնտեսութեան նախարարի տեղակալը Աշոտ Մինասեանն է, հանրապետութեան կալուածատուրքի պալատը կը գլխաւորէ տնտեսութեան նախկին նախարար Դաւիթ Իրադեանը: Թէեւ Հայաստանի եւ Ապխազիոյ միջեւ դիւանագիտական յարաբերութիւններ չկան, այնուամենայնիւ աստիճանաբար կը զարգանան տնտեսական կապերը, հիմնականին մէջ` մասնաւոր գործարարութեան մակարդակի վրայ:

Այս պահուն կը քննարկուի Հայաստանէն Ապխազիա ձկնամթերք արտահանելու, իսկ Ապխազիայէն Հայաստան` ձկան հումք ներկրելու հարցը:

Լուսանկարը` սփութնիկ Արմէնիայի: