Հոկտեմբեր 28-ին Թոքիոյի մէջ տեղի պիտի ունենայ «IT’s Armenia» խորագիրով սեմինար` նուիրուած Հայաստանի ՏՏ ոլորտի ներկայացման:

Սեմինարին նպատակն է նպաստել Ճափոնի` Հայաստանի հետ համագործակցելու հետաքրքրուածութեան խորացման, գործարար յարաբերութիւններու ստեղծման, կը  յայտնեն տեղեկատուական արհեստագիտութիւններու ձեռնարկութիւններու միութենէն:

Հայաստանեան պատուիրակութեան մէջ են «Ինստիկէյթ», «ՎՕԼՕ», «Արմինովա Թեքնոլոճիս», «Լեւիաթան», «ԱյԵունեթուորքս», «Վիէմուեր Իսթերն եուրոփ» եւ «Գրանատուս Վենչուրս» ընկերութիւններու ներկայացուցիչներ:

Տեղեկատուական արհետսագիտութիւններու ձեռնարկութիւններու միութեան անդամ-կազմակերպութիւնները հանդիպումի ընթացքին մասնաւորապէս պիտի ներկայացնեն միութեան կողմէ իրականացուող ձեռնարկներն ու ծրագիրները` ուղղուած հայաստանեան ՏՏ մակնիշի յառաջխաղացման:

«IT’s Armenia» սեմինարը կը կազմակերպեն Ճափոնի մէջ Հայաստանի դեսպանութիւնը` ի դէմս արտակարգ եւ լիազօր դեսպան Հրանդ Պօղոսեանի, Ճափոնի արտաքին առեւտուրի կազմակերպութիւնը (JETRO), Ճափոնի արտաքին գործոց նախարարութիւնը, Ճափոն-Հայաստան գործարար եւ մշակութային նախաձեռնութիւնը, Ռուսաստանի եւ նորանկախ պետութիւններու հետ տնտեսական համագործակցութեան կազմակերպութիւնը (ROTOBO) եւ Ճափոնի միջազգային համագործակցութեան գործակալութիւնը (JICA):