Համազգայինի Լաթաքիոյ «Վ. Նաւասարդեան» մասնաճիւղի կազմակերպած ձեռնարկը. «Գառնի» պարախումբը խնադավառեց հանդիսատեսը

Երեքշաբթի, 11 հոկտեմբեր 2016-ի, երոկոյեան ժամը 6:00-ին, հովանաւորութեամբ՝ Բերիոյ Հայոց Թեմի առաջնորդ Գերշ. Տ. Շահան Արք. Սարգիսեանի, կազմակերպութեամբ՝ Համազգայինի Լաթաքիոյ «Վ. Նաւասարդեան» մասնաճիւղի, «Տար ալ-Ասատ» մշակութային սրահէն ներս «Գառնի» պարախումբը ներկայացաւ պարերու փունջով մը: Այս մասին ըստ «Հայերն այսօրի»՝ կը յայտնէ PERIO NEWS-ը:
Հանդիսութեան բացումը կատարուեցաւ Սուրիոյ եւ Հայաստանի Հանրապետութիւններու զոյգ քայլերգներով եւ մէկ վայրկեան յոտնկայսով:
Ներկայ էին Հոգեշնորհ Տէր Արտակ վարդապետ Արապեան, Տէր Տաթեւ Ա. Քհնյ. Միքայէլեան, զանազան միութիւններու ներկայացուցիչներ եւ շուրջ 300 հանդիսականներ:
Հայերէն բացման խօսքը ուղղեց «Վ.Նաւասարդեան» մասնաճիւղի Ատենապետ Նայիրի Կարապետեան, որ յիշեցուց, թէ հայ ժողովուրդը իր դարաւոր պատմութեան ընթացքին ունեցած է հարուստ մշակոյթ, հայերէն երգն ու հայկական պարը միշտ ծաղկեցուցած են բեմերը, հմայած հայ թէ օտար արուեստասէր հանրութեան:
«Այսօր անհուն ուրախութեամբ կը յայտարարենք, թէ մեր գաղութին մէջ, արդէն իսկ վերակազմուած է հմազգայինի «Վ.Նաւասարդեան» մասնաճիւղը, եւ անկասկած պիտի վերագտնէ իր երբեմնի աշխուժ գործունէութիւնը, որուն արգասիքը պիտի վայելենք բոլորս, մասնաւորաբար նորահաս սերունդը, որ պիտի արժանանայ միութեանս յատուկ հոգատարութեան զարգացնելով իրենց ձիրքերն ու նախասիրութիւնները», հաստատեց ան: Կարապետեան յայտնեց, որ Համազգայինի Լաթաքիոյ «Վ.Նաւասարդեան» մասնաճիւղի վարչութիւնը, հիւրընկալած է վիրավոր Հալէպէն ժամանած «Գառնի» պարախումբը, ղեկավարութեամբ Վրէժ եւ Նանօր Թերզեաններուն, որոնք հակառակ բոլոր դժուարութիւններուն, ընդառաջեցին միութեան առաջարկին եւ այսօր իրենց հմայիչ պարերով պատրաստ են ճոխացնելու մեր երեկոն»:
Իսկ արաբերէն բացման խօսքով հանդէս եկաւ մասնաճիւղի վարչութեան Ատենադպրուհի Սարին Կիրակոսեան-Գէորգեան:
Այնուհետեւ, բեմ հրաւիրուեցաւ «Գառնի» պարախումբը: «Գառնի» պարախումբը հանդէս եկաւ հայկական եւ օտար պարերով: Ուշագրաւ էին տղոց ռազմական պարը եւ աղջիկներու` կուժերով պարը. առաջինը իր շարժումներով եւ երաժշտութեամբ պահած էր իր աւանդական ձեւն ու խորքը` փոխանցելով հայդուկներու արդարադատ եւ վրէժխնդիր ոգին: Իսկ երկրորդը, ընդհակառակն. աւանդական կուժերով պարը, որ յատուկ տեղ կը գրաւէ աշխարհահռչակ «Անուշ» օփերային մէջ, ներկայացուեցաւ արդիականացած ձեւով, երաժշտութեան, շարժուձեւերուն, ինչպէս նաեւ տարազներուն ընդմէջէն: Ինչ կը վերաբերի օտար պարերուն, պարողները ներկայացուցին ժամանակակից, պիւրլեսք, հիփ հոփ, սալսա, հնդկական եւ ճափոնական պարեր:
Պարողները բեմ բարձրացան վերջին պարով մը` ելոյթին ընթացքին ներկայացուած տարբեր պարերու, երաժշտութիւններու եւ տարազներու հերթականութեամբ: «Գառնի» պարախումբը արժանացաւ բուռն ծափահարութեան եւ հանդիսատեսներու բացագանչութիւններուն: Պարողները բոլոր պարային ներկայացումները կատարեցին փոխանցիկ աշխուժութեամբ եւ ուրախութեամբ, հանդիսատեսներուն զգալի դարձնելով զիրենք շարժող ներքին ուժը: Անոնք անգամ մը եւս փաստեցին, թէ քաղաքական եւ ընկերային աննպաստ պայմաններուն մէջ, արուեստը եւ պարը նոր շունչ եւ կենսատու ուժ կը հանդիսանան մարդուն համար:
Հանդիսութեան աւարտին խօսք առաւ Տէր Տաթեւ Ա. Քհնյ. Միքայէլեան, իսկ Հոգեշնորհ Տէր Արտակ վարդապետ Արապեան «պահպանիչ» աղօթքով փակուեցաւ հանդիսութիւնը: