Սեպտեմբեր 22-ին ՀՀ Անկախութեան 25 ամեակին նուիրուած միջոցառում մը տեղի ունեցաւ, Ամմանի Մարզական Միութեան վարչութեան նախաձեռնութեամբ:

Ձեռնարկ ներկայ էին Յորդանանի հայ համայնքի հոգեւոր հովիւ հոգշ. Տ. Աւետիս վրդ. Էփրէճեանը, ԱՄՄ-ի վարչական անդամները և Յորդանանի հայ համանքը: Այս մասին «Հայերն այսօր»-ին կը յայտնեն Ամմանի Մարզական Միութենէն:

Տօնակատարութիւնը բացուած յայտարարուեցաւ Յորդանանի և Հայաստանի օրհներգներու յոտնկայս ունկնդրութեամբ, որուն յաջորդեց ԱՄՄ-ի սկաուտական դրօշախումբի մուտքը փողերախումբի ընկերակցութեամբ: Այնուհետեւ ողջոյնի և բացման խօսքով ելոյթ ունեցաւ ԱՄՄ-ի ատենապետ Յակոբ Սերփէքեանը որը անդրադառնալով անկախութեան խորհուրդին, փոխանցեց իր մաղթանքները, նշելով որ այն հպարտութիւն և մեծ ուրախութիւն պարգեւեց բոլոր հայութեան:

Ծրագիրը շարունակեց հոգշ. Տ. Աւետիս վրդ. Էփրէճեանի պատգամով, որ փոխանցեց բոլորին, յիշեցնելով միասնականութեան և զօրութեան մասին:

Ետքը հանդէս եկաւ օրուայ բանախօս Տիկ. Թալին Յակոբեանը, անդրադառնալով Հայաստանի անկախութեան խորհրդանշական նշանակութեան մասին՝ շեշտելով, որ հայ ժողովուրդը եւս մէկ անգամ ապացուցեց իր հաստատակամութիւնը՝ չնայած ամենածանր տնտեսական ու աշխարհաքաղաքական պայմաններուն, որոնք կարողացաւ յաղթայարել նորաստեղծ հանրապետութիւնը՝ դառնալով միջազգային հանրութեան անդամ: Տիկ. Թալին մասնաւորապէս նշեց որ «25 տարի առաջ այս օրերուն մեր ժողովուրդը միասնաբար, ձայներու մեծամասնութեամբ (ԱՅՈ) ըսաւ, անկախութիւնը ընտրելով որպէս միակ հնարաւոր կարգավիճակ և երկրի հետագայ զարգացման անշեղ ուղի, բանալով պատմութեան ոսկետառ նոր փուլ մը՝ աշխարհին յայտարարելով, որ պատրաստ է ըլլալ ազատ, անկախ, ինքնիշխան, և կերտել սեփական ճակատագիր, իրականացնելով այն ինչ որ աշխարհով մէկ սփռուած բոլոր հայերու ցանկութիւնը, աղօթքն ու երազանքն էր»: Տիկ. Թալին եզրափակելով իր խօսքը շնորհաւորեց բոլոր հայութեան այս ամէնակարեւոր տօնի կապակցութեամբ, կարեւորելով Հայաստան, Արցախ և Սփիւռք եռամիասնութիւնն ու վճռականութիւնը, պետութեան կայեացման և շարունակական զարգացման գործին:

Տօնակատարութեան երկրորդ բաժինը կատարուեցաւ աւանդական մոմավառութեամբ բոլոր ներկաներու կողմէ, և կարկանդակի հատման արարողութեամբ, որ կատարեցին ԱՄՄ-ի ներկայ վարչական անդամները:

Ուրախ երեկոյի ընթացքին սպասարկուեցան համեղ և ախորժաբեր աղանդներ, պատրաստուած ԱՄՄ-ի տիկնաց յանձնախումբի անձնուէր տիկիններու ձեռամբ:

Օրուան հանդիսավարն էր Տիկ. Տալիտա Մահսէրէճեանը որ իր կատարողութեամբ կրցաւ օրը դարձնել աւելի բովանդակալի և հետաքրքիր:

Իսկ միջոցառման երաժշտական բաժինը յանձնուած էր Արամ Յակոբեանի որ իր պատրաստած հայրենասիրական և ժողովրդական երգերով երեկոն խանդավառելով առաւել աշխուժութիւն և տօնական մթնոլորտ ներշնչեց ձեռնարկին:

Խրախճանքը շարունակեց մինչեւ ուշ գիշեր, ջերմ ու մտերմիկ մթնոլորտի մէջ: