ԱՀԱՐՈՆ ՇԽՐՏԸՄԵԱՆ «Հայերն այսօր»-ին կը գրէ.

Հայրենիքը այնանփոխարինելի  պատուարն  է, որուն պաշտպանութեան համար   թափուող արիւնը յաւերժութեան  ուղենիշ կը ծառայէ անոր  զաւակներուն:

Մեր  ժողովուրդի պատմութիւնը եղած է գոյակռիւներու, փոթորկայոյզ  դրուագներու, տխրայուշեւ  լուսաւորէջերու համայնապատկեր:

Մեր ժողովուրդի  նորագոյն պատմութեան երկնակամարը  կը  խաւարի  կազմակերպուած Ցեղասպանութեամբ, կը  փայլատակի  Սարդարապատի հերոսամարտով, ապա՝ Մայիսեան հանրապետութեան  ծնունդով:

Սարդարապատի  յաղթանակէն  քանի մը օր ետք, անկախութեան տեսիլքը  իրականութիւն դարձաւ  պատմական  հայրենիքի մէկ տասերորդ տարածութեան վրայ: Ցեղասպանութենէն վերապրող մեր ժողովուրդը նորանկախ  պետականութեան ծիլերուն մէջ տեսաւ վերածնունդի ու փրկութեան վերջին կռուանը:

Մայիսեան անկախութիւնը եղաւ կարճատեւ: Միջազգային եւ շրջանային  աշխարհաքաղաքական նոր դաշինքներու եւ փոփոխութիւններու ստիպողութեան  տակ  խորհրդային կարգեր հաստատուեցան  Հայաստանի մէջ: Շնչող անկախութեան  գաղափարախօսութիւնը  դարձաւ երազ…

Խորհրդային  վարչակարգն ալ տեղի տուաւ պատմութեան զարգացումներուն: Պետութիւններ մէկ առ մէկ սկսան դուրս գալ տասնվեց հանրապետութիւններէ բաղկացած  ամբողջատիրական  համակարգէն:

  23  Օգոստոս  1990-ին,  Խորհրդային Հայաստանի Գերագոյն Խորհուրդը որդեգրեց Հայաստանի անկախութեան հռչակագիրը:

21 Սեպտեմբեր 1991-ին, հայրենի ժողովուրդը, ջախջախիչ մեծամասնութեամբ, հանրաքուէի միջոցով արտայայտեց Խորհրդային Միութեան կազմէն դուրս գալու եւ անկախութիւնը վերականգնելու իր ընտրանքը:

   Անկախութեան հանրաքուէն համազգային վճռակամութեան եւ հաւաքական կամքի արտայայտութիւն էր, ինչպէս նաեւ նոր  պատասխանատուութիւններու մարտահրաւէր:  Հայաստան, աստիճանաբար դարձաւ Միացեալ Ազգերու Կազմակերպութեան եւ այլ միջազգային հեղինակաւոր կառոյցներու անդամ:

Այսօր,  աշխարհասփիւռ   հայ  ժողովուրդը   կը նշէ  քառորդդարեայ   անկախութեան  տարեդարձը:  Անկախութեան  քսան եւ հինգ տարիներու անուրանալի  իրագործումները  արձանագրելով  հանդերձ, չենք կրնար  անտեսել  այն բացթողումները, որոնք  կրնան ալեկոծել  մեր  ժողովուրդին եւ պետականութեան  վաղուան օրը:

Անկախութեան տօնը  առիթ մըն է արժեւորելու անցնող քսան եւ հինգ տարիներու իրագործումները, քննարկելու բացթողումներուն պատճառները, խորհրդածելու եւ  հետեւութիւններ  հանելու, յանուն պետականութեան եւ  ժողովուրդի   բարօրութեան: Արժեւորենք մեր ներկան, որպէսզի կերտենք  համայն հայութեան երազներու Հայաստանը:

Դժուար եղան անկախութեան  առաջին  քսան եւ հինգ տարիները:  Բայց երկար  է  նաեւ յուսախաբութիւններու շարքը: Պիտի խոստովանինք այս մէկը: Համոզուած  ենք, որ սրտցաւ, կառուցողական  քննադատութիւնը  նպաստաւոր  իր դերակատարութիւնը պիտի ունենայ, ի շահ մեր  հայրենիքին, պետականութեան  եւ ժողովուրդին:  Չպահուըտինք մեր  մատի ետին, ինչպէս կը  փորձեն շատեր: Ընկերային, տնտեսական,  քաղաքական  խոր  շերտերով  երանգաւորուած  է մեր հայրենական առօրեան…:

Դժբախտաբար, իրաւական եւ ընկերային արդարութեան վրայ յենած պետականութիւնը կը մնայ անկախութեան քսան հինգ եւ տարիներու մեծագոյն  բացական: Արտագաղթի ցուցանիշները կը մտահոգեն  բոլորս: Անկախութիւնը  հաւաքական  պատասխանատուութիւններ կ’ենթադրէ  ի սփիւռս  աշխարհի եւ  հայրենիքի: Ի վերջոյ, օտարութիւնը  պիտի   չդառնայ  հայրենիք:  Հայրենիքն է մեր բոլորին  վերջին կայարանը, անկասկած:  Հզօր պետականութեան  հովանիին տակ պիտի  ծաղկին  հայրենաշինութեան եւ  հողային պահանջատիրութեան  ոգիով դաստիարակուող սերունդները: Հզօր պետականութիւն մը միայն ժողովուրդը  պիտի ներշնչէ համոզուելու Արցախի հակամարտութեան  լուծումի առաւելագոյն կարելիին:

Հայաստանի անկախութեան քսան եւհինգ տարիներուն առիթով, մեր սրտագին մաղթանքն է, որ հայրենակերտումը  դառնայ համահայկական  համոզում: Հայրենակերտումը  եւ պետական մտածելակերպը  ազգային գաղափարախօսութեան  հիմնաքար  ծառայեն մեր հայրենիքի քաղաքական այրերուն: Գուրգուրանք եւ պահպանենք պատերազմի դաժանութիւններու եւ զրկանքներու  գնով կերտուած անկախութիւնը:

Անկախութեան  օրը, յաւերժի  ճանապարհին վրայ  ինկած  հայրենիքի  նահատակներուն ուխտի եւ հաւատարմութիւն օրն է: Անկախութեան  օրը  հայրենիքի սահմաններուն պաշտպան, քաջարի բանակին զօրակցութեան օրնէ միաժամանակ: Բայց աւելի կարեւորը՝ հզօր պետականութիւն  կառուցելու  հաւաքական  յանձնառութեան օրը:

Անկախութեան  օրն է այսօր: Բոլորուինք համայն հայութեան  հայրենիքին    շուրջ:

  Բիւր յարգանք, Հայաստանի անկախութեան  համար  ինկած մեր նահատակներուն: