Ռ. Յարթունեան՝ Ամերիկայի Ընդհանուր Դատախազի Խորհրդատու

Նիւ Եորքի հիւսիսային շրջանի հայազգի դաշնակցային դատախազ Ռիչըրտ Յարթունեան Երկուշաբթի, Օգոստոս 22ին նշանակուած է Միացեալ Նահանգներու ընդհանուր դատախազ Լորեթա Լինչի քաղաքականութեան հարցերով խորհրդատուական յանձնաժողովի նախագահ։
Այս տեղեկութիւնը հաղորդած «timesunion.com» կայքը կը նշէ, թէ Տել Մար քաղաքէն 55ամեայ Յարթունեան աւարտած է «Ճորճթաուն» համալսարանը եւ նշեալ յանձնաժողովին փոխնախագահը դարձած էր 2015ի Յունուարին:
Յանձնաժողովի պարտականութիւնն է հաստատել Միացեալ Նահանգներու արդարադատութեան նախարարութեան քաղաքականութիւնը, խթանել համագործակցութիւնը նահանգներու ընդհանուր դատախազներուն հետ, ինչպէս նաեւ նպաստել իրաւական չափանիշներու կիրառման հետեւողականութեան:
«Վստահ եմ, որ Ռիչըրտ Յարթունեան պատրաստ է ստանձնելու այսպիսի կարեւոր կառոյցի մը ղեկավարութիւնը», յայտարարած է Լինչ: