Աւելի քան յիսուն տարիներէ ի վեր Պուրճ Համուտի մէջ գործող ընկերային ծառայութեան կեդրոնի` «Ճինիշեան» յիշատակի ձեռնարկի 50-ամեակը շքեղ հանդիսութեամբ նշուեցաւ երէկ` ուրբաթ, 22 յուլիս 2016-ի երեկոյեան ժամը 8:00-ին, Ազգային առաջնորդարանի «Երջօ Սամուէլեան-Եռագոյն» հանդիսասրահին մէջ` ներկայութեամբ հոգեւոր հայրերու, հիւր անձնաւորութիւններու, միութենական ներկայացուցիչներու եւ հաւատացեալ ազգայիններու հոծ բազմութեան:

Լիբանանեան եւ հայկական քայլերգներու յոտնկայս ունկնդրութենէն ետք, բացման խօսքով «Ճինիշեան» յիշատակի ձեռնարկի Պէյրութի խորհրդատու մարմինի ատենապետ Րաֆֆի Հապիպեան ողջունեց ներկաները` նշելով ձեռնարկին առիթն ու կարեւորութիւնը: «Սոյն հանդիսութիւնը պատեհ առիթ է հանրութիւնը ծանօթացնելու «Ճինիշեան» յիշատակի ձեռնարկին գործունէութեան: Այսօրուան ձեռնարկը յարգանքի տուրք մըն է Վարդան Ճինիշեանին», ընդգծեց Հապիպեան:

Ապա խօսք առաւ «Ճինիշեան» յիշատակի ձեռնարկի տնօրէն Փոլին Սաղըրեան, որ շնորհակալութիւն եւ երախտագիտութիւն յայտնեց Վարդան Ճինիշեանի հիմնած այս կեդրոնին մէջ ծառայած բոլոր նուիրեալներուն: Թուելով կեդրոնի գործունէութեան առաքելութիւնն ու իրագործումները` Սաղըրեան յատուկ կերպով արժեւորեց եւ բարձր գնահատեց «Ճինիշեան» յիշատակի ձեռնարկի հանգուցեալ նախկին տնօրէնները` Հանզ Շելլենպըրկը, Հայկ Թիլպեանն ու Սեդա Փամպուքեանը: Փոլին Սաղըրեան սեղմ գիծերու մէջ ներկայացուց «Ճինիշեան» յիշատակի ձեռնարկի բարերար Վարդան Ճինիշեանը` իր խոր երախտագիտութիւնը յայտնելով անոր այս ազգօգուտ նախաձեռնութեան համար:

Ապա ցուցադրուեցաւ տեսերիզ մը` «Ճինիշեան» յիշատակի ձեռնարկի հիմնադրութեան, գործունէութեան ու առաքելութեան մասին, ուր Մարաշի մէջ ծնած ու Եղեռնէն ճողոպրած Վարդան Յարութիւն Ճինիշեան ամերիկահայ գործարարը տասը միլիոն տոլարի նուիրատուութեամբ կը հիմնէ այս կեդրոնը` 1965-ին: Անցնող 24 տարիներուն «Ճինիշեան» յիշատակի ձեռնարկը կը գործէ նաեւ Հայաստանի մէջ:

Ապա խօսք առաւ նաեւ յատուկ այս առիթով հիւրաբար Լիբանան եկած` «Ճինիշեան» յիշատակի ձեռնարկի գործադիր տնօրէն Էլիզա Մինասեան, որ իր եւ Միացեալ Նահանգներու «Ճինիշեան» յիշատակի ձեռնարկի կեդրոնական մարմինին անունով շնորհակալութիւն յայտնեց սոյն ձեռնարկի կազմակերպիչներուն` ցաւ յայտնելով, որ տխուր պատճառով չէ կրցած իրեն ընկերանալ մարմինի մէկ այլ անդամը` Մարք Մոմճեանը: Մինասեան բարձր գնահատեց «Ճինիշեան» յիշատակի ձեռնարկին գործունէութիւնն ու իրագործումները` իր ցաւակցութիւնը յայտնելով նախկին տնօրէն Սեդա Փամպուքեանի կորուստին համար: Ան նաեւ ցաւ յայտնեց, որ հայ ազգը տակաւին շատ պէտք ունի օգնութեան` մաղթելով, որ «մեր հայրենակիցները օգնութեան կարիք չունենան ո՛չ Հայաստանի մէջ, ո՛չ ալ անկէ դուրս»: Այս առիթով Էլիզա Մինասեան արուեստի յատուկ գործ մը նուիրեց «Ճինիշեան» յիշատակի ձեռնարկի Լիբանանի տնօրէն Փոլին Սաղըրեանին:

Այս առիթով իր սրտի խօսքը փոխանցեց նաեւ հիւրաբար Հայաստանէն եկած «Ճինիշեան» յիշատակի ձեռնարկի խորհրդատու մարմինի նախկին անդամ գերապայծառ Նշան արք. Գարաքէհէեան:

Ատենապետ Րաֆֆի Հապիպեանի կողմէ զինք գնահատող ներկայացումէն ետք, գերապայծառ Գարաքէհէեան խիստ բարձր գնահատեց կեդրոնին գործունէութիւնը` նշելով, որ բարերար Վարդան Ճինիշեան շատ մօտէն ճանչցած է հայ ժողովուրդի ցաւերն ու կարիքները, «բայց ինչ որ աւելի կարեւոր է` իր մօտեցումի կերպն է` քրիստոնէական եղբայրասիրութիւնը, նուիրուած` իր կարիքաւոր եղբայրներուն»: Մէջբերելով աղքատ Ղազարոսի օրինակը, գերապայծառ Գարաքէհէեան վեր առաւ բարերար Վարդան Ճինիշեանի նկարագրային յատկանիշները` իբրեւ համեստ, լուռ գործող, հեռու ցուցամոլութենէ օրինակելի բարի տիպար: Գերապայծառ Գարաքէհէեան ցաւ յայտնեց, որ հայ ազգը տակաւին չէ յաջողած իր ետին նետել գաղթականի ցուպը, «որովհետեւ տակաւին տեղ չէ գտած նոյնիսկ իր սեփական հայրենիքին մէջ»: Ան մէջբերեց նաեւ Վահան Թէքէեանի բանաստեղծութենէն «Կեանքէն ինծի ի՞նչ մնաց… ինչ որ տուի…» տողերը: Այս առիթով «Ճինիշեան» յիշատակի ձեռնարկի տնօրէն Փոլին Սաղըրեան յատուկ յուշագիր մը նուիրեց գերապայծառ հօր:

Այս առիթով իրենց երկարամեայ նուիրեալ ու ժրաջան գործունէութեան համար գնահատանքի յատուկ շնորհակալագիրներ ստացան Ռաֆայէլ Ումուտեան, Եսթեր Հայտոսթեան-Փիլաւեան, Մարօ Թոնդեան, Զուարթ Թելեան-Նաճարեան, Վազգէն Չեքիճեան եւ Անի Պուճիգանեան:

Ի բացակայութեան ցանկին մէջ նշուեցան նաեւ տոքթ. Ռոպովթ Չորպաճեան եւ տոքթ. Կարպիս Հարպոյեան, որոնք Լիբանանէն դուրս կը գտնուին:

Ապա Փոլին Սաղըրեան փակման խօսքով յատուկ շնորհակալութիւն յայտնեց սոյն ձեռնարկի յաջողութեան նպաստած բոլոր կամաւորներուն:

Այս առիթով ներկայացուեցաւ գեղարուեստական յատուկ յայտագիր, ուր Հրաչ Իսահակեան (սրինգ), Աննա Փասթուքլովա (ջութակ), Ուիսամ Ապտելնուր (միջակ ջութակ) եւ Նայիրի Ղազարեան (թաւջութակ) քառեակը ներկայացուց Կոմիտասէն «Շողեր ջան», «Ալ այլուղս», «Կաքաւի երգ»-ը եւ «Վաղարշապատի պար»-ը:

Աւարտին, Լիբանանի հայոց թեմի առաջնորդ Շահէ եպս. Փանոսեան, Հայ կաթողիկէ պատրիարքութեան ներկայացուցիչ հայր Սեպուհ վրդ. Կարապետեան եւ Հայ աւետարանական համայնքի ներկայացուցիչ վեր. դոկտ. Փոլ Հայտոսթեան կատարեցին իրենց օրհնութեան աղօթքը:

Այս մասին կը յայտնէ Ազդակ: