«Դեռ մանկութենէս ինծի համար անարդարութիւնը, ապօրինութիւնն ու մարդու իրաւունքներու ոտնահարումը անընդունելի  եղած են: Երբ դպրոցը աւարտելէ յետոյ մասնագիտական ընտրութեան առջեւ կանգնեցայ, հասկցայ, որ կարելի է նաեւ դիւանագիտութեան ճանապարհով պայքարիլ վերոնշեալ արատաւոր երեւոյթներուն դէմ»,- «Հայերն այսօր»-ի հետ զրոյցին ըսաւ Աստղիկ Յակոբեան, որ Հայաստանէն ուսման նպատակով տեղափոխուած է ԱՄՆ` ընդունուած  Կլէնտելի համայնքային քոլեջի քաղաքագիտութիւն եւ միջազգային յարաբերութիւններ բաժանմունքը:

Աստղիկը ուսանելու ընթացքին մէկ տարի Քալիֆորնիոյ Հայ ուսանողներու միութեան նախագահը  եղած է, սերտ համագործակցութեան մէջ կը գտնուի նաեւ հայկական տարբեր կազմակերպութիւններու հետ, որոնց հետ տարաբնոյթ աշխատանքեր կ’իրականացնէ` Հայաստանը օտարազգիներուն ճանաչելի դարձնելու ուղղութեամբ:

Աստղիկը անվարան կ’ըսէ, որ յետագային իր գործունէութեան կեդրոնին Հայաստանը պիտի ըլլայ: Հայաստանի կամ արտասահմանի մէջ ապրիլը, որեւէ նշանակութիւն  պիտի չունենայ: Բոլոր հնարաւորութիւնները պիտի ներդնէ` հզօր, ապահով Հայաստան ունենալու համար:

Հայ ուսանողներով Ապրիլեան քառօրեայ պատերազմի տագնապալի օրերուն նոյնպէս քայլեր  ձեռնարկած են` Արցախին օգնութիւն տրամադրելու նպատակով: Դրամահաւաք  կազմակերպած, որուն հասոյթը Աստղիկը շուտով Արցախ պիտի տանի` յանձնելու գիւղերու բնակիչներուն:

Բացի դրամահաւաքէն, քոլեջին մէջ մարդոց պարբերաբար իրազեկած են Ատրպէյճանի  ռազմական գործողութիւններուն հետեւանքով Արցախի մէջ տիրող իրավիճակին մասին, որպէսզի խուսափին ապատեղեկատուութենէն:

Իբրեւ ապագայ դիւանագէտ` Աստղիկը կը կարծէ, որ Լեռնային Ղարաբաղի հարցի վերջնական լուծումը կախուած է հայ ժողովուրդի համախմբումէն  եւ ազգային գիտակցութեան բարձրացումէն, որմէ ետք  միայն  վերջնական յաղթանակի կը հասնինք:

«ՀՀ սփիւռքի նախարարութեան նախաձեռնութեամբ, Հայկական բարեգործական ընդհանուր միութեան, «Լոյս» եւ «Այբ» հիմնադրամներուն հետ համագործակցութեամբ կայացած «Հայաստան. ստեղծենք միասին» առաջին երիտասարդական հաւաքին մասնակցիլը մասնագիտական տեղեկատուութեան մեծ պաշար տուաւ ինծի: ԱՄՆ-ի մէջ դժուար թէ յաջողէի` ինծի հետաքրքրող հարցերու պատասխանները ստանալ:

Հաւաքի զեկուցողները, տարբեր ոլորտի մասնագէտները ինծի շատ օգնեցին. անոնցմէ նոր մտքեր, գաղափարներ եւ առաջարկներ ստացայ»,- իր խօսքը ամփոփեց Աստղիկ Յակոբեան:

Գէորգ Չիչեան