Յունիս 27-ին Սուրիոյ մէջ ՀՀ դեսպան փրոֆ.Արշակ Փոլատեան հանդիպում ունեցած է Սուրիոյ խորհրդարանի նորընտիր նախագահ դոկտ. Հատիա Խալաֆ Ապպասի հետ: Հանդիպման ընթացքին դեսպանը անոր փոխանցած է ՀՀ Ազգային Ժողովի նախագահ Գալուստ Սահակեանի շնորհաւորական ուղերձը: Այս գծով ՀՀ դեսպանութիւնը հրապարակած է մամլոյ հաղորդագրութիւն մը:
Սուրիոյ խորհրդարանի նորընտիր նախագահը շնորհակալութիւն յայտնած է ուղերձին համար, խնդրելով իր և Սուրիական Արաբական Հանրապետութեան խորհրդարանի նորընտիր անդամներուն անունով ջերմ ողջոյններ և բարեմաղթութիւներ փոխանցել ՀՀ քաղաքական ղեկավարութեան և Հայ ժողովուրդին: Ապա՝ Հատիա Ապպաս խիստ կարևոր համարած է հայ-սուրիական յարաբերութիւններու բարեկամական բարձր մակարդակը, յատկապէս միջխորհրդարանական համագործակցութիւնը:
Զրոյցի ընթացքին դեսպանը անդրադարձած է Սուրիոյ մէջ Հայոց Ցեղասպանութեան դատապարտման և ճանաչման ուղղութեամբ ձեռնարկուած քայլերուն:
Հանդիպման աւարտին կողմերը քննարկած են նաև երկու երկիրներու խորհրդարաններու համագործակցութեան հեռանկարները և նորընտիր խորհրդարանէն ներս հայ – սուրիական բարեկամական խումբի ձևաւորման խնդիրը:

Այս մասին կը յայտնէ Գանձասար: