Հայ Յեղափոխական Դաշնակցութեան Արեւմտեան Ամերիկայի 51րդ Շրջանային ժողովը, որ տեղի ունեցաւ Յունիս 16-19 երկարող օրերուն ընթացքին, հանգամանօրէն քննարկեց նախորդող երկու տարիներուն ընթացքին կուսակցութեան ունեցած գործունէութիւնը եւ կատարեց համապատասխան արժեւորումը: Ժողովը քննարկեց նաեւ շրջանին առնչուող կուսակցական եւ համայնքային բնոյթի բոլոր հարցերը, ինչպէս նաեւ հանգամանօրէն անդրադարձաւ Հայաստանի ու Սփիւռքի համահայկական բնոյթի հիմնական հարցերուն:

Շրջանային ժողովը, անդրադառնալով նաեւ յառաջիկայ երկամեայ կուսակցական գործունէութեան հիմնական ուղղութիւններուն, հետեւեալ պարտականութիւնները յանձնեց նորընտիր Կեդրոնական կոմիտէին՝ առ ի գործադրութիւն.

ա.- Թափով ու հետեւողականութեամբ յառաջ տանիլ շրջանի կազմակերպութեան ուժեղացումն ու  երիտասարդութեան գաղափարական ու քաղաքական  դաստիարակութիւնը, ի գործ դնելով ժամանակակից ու արդիւնաւէտ աշխատանքի միջոցներ:

բ.- Ճիգ չխնայել հայկական համայնքը համախմբելու եւ անոր ազգային դիմագիծը ամրապնդելու եւ զայն լծելու համայն հայութեան հզօրացման առաքելութեան:

գ.- Բարոյապէս ու գործնականօրէն զօրակցիլ Հայաստանի մէջ արդար հասարակարգ ստեղծելու Հայաստանի մեր կազմակերպութեան աշխատանքներուն ու պետականութեան ամրակայման ծրագիրներուն:

դ.- Համաամերիկեան քաղաքական ու հասարակական շրջանակներէն ներս հայանպաստ ու հայաստանանպաստ տրամադրութիւնները քաջալերելով՝ խորացնել հայութեան պահանջատիրական պայքարի յառաջընթացը եւ ամրապնդել  Հայաստանի ու Արցախի անվտանգութեան ու զարգացման երաշխիքները:

ե.- Վճռականօրէն սատարել Արցախի ինքնորոշման ու ամբողջականութեան պահպանման նուիրական գործին լծուած ՀՅԴ Արցախի կառոյցին ու ընդհանրապէս Արցախի ժողովուրդի ամէնօրեայ մարտնչումին:

զ.- Շարունակել առաւելագոյն յանձնառութեամբ տէր կանգնիլ Արեւմտեան Հայաստանի գծով, Թուրքիայէն հողային մեր պահանջատիրական պայքարի վեհ գործին:

է.- Սուրիահայութեան կողքին կանգնիլ, իր գոյութեան համար պայքարող այս կարեւոր համայնքին տրամադրելով շրջանիս ամբողջական զօրակցութիւնը:

Ժողովի աւարտին ընտրուեցաւ շրջանի Կեդրոնական կոմիտէն, որ յաջորդ երկու տարիներուն ընթացքին պիտի ծառայէ շրջանի կարիքներուն:

ՀՅԴ ԱՐԵՒՄՏԵԱՆ ԱՄԵՐԻԿԱՅԻ

51ՐԴ ՇՐՋԱՆԱՅԻՆ ԺՈՂՈՎ