Ազգային Սրբոց Քառասնից Մանկանց վարժարանը իր տարեկան ծրագիրին մէջ, աշակերտներուն գիտելիքներ ջամբելու զուգահեռ, նաեւ շեշտը կը դնէ հայեցի եւ ընտանեկան արժէքներու կերտման եւ պահպանման աշխատանքին վրայ:

Այս ծիրէն ներս, 6-րդ դասարանի աշակերտները տարուան ընթացքին դպրոցական տարբեր ձեռնարկներ կազմակերպելով ապահովեցին նիւթական կոկիկ գումար մը եւ մայրերու տօնին առիթով, չորեքշաբթի, 18 մայիս 2016-ին, այցելեցին Պուրճ Համուտի ՔԱՀԼ-ի  Հայ տարեցներու տունը:

Աշակերտները իրենց երգերով, մաղթանքներով, արտասանութիւններով եւ պարերով խանդավառ մթնոլորտ ստեղծեցին սրահին մէջ, ուր հաւաքուած էին խումբ մը տարեց մամիկներ: Նաեւ այցելեցին սենեակները եւ ուրախացուցին բոլոր անոնց, որոնք չէին կրցած սրահ ներկայ գտնուիլ:

Ապա տեղի ունեցաւ հիւրասիրութիւն, որմէ ետք իւրաքանչիւր մամիկ ստացաւ վարդ մը եւ փոքրիկ նուէր մը:

Աշակերտները վերադարձան դպրոց բարձր տրամադրութեամբ եւ հոգեկան մեծ գոհունակութեամբ, որովհետեւ ոչ թէ միայն ուրախացուցին ՔԱՀԼ-ի պատսպարեալները, այլ նաեւ իրենց ճակտի քրտինքով վաստկած լուման էր, որ տրամադրեցին այս ձեռնարկի յաջողութեան:

Այս մասին կը յայտնէ Ազդակ: