«Հայերն այսօր»-ի թղթակիցը կապ  հաստատած է Տաւուշի  մարզի սահմանամերձ գիւղերու բնակիչներուն հետ. այս անգամ  հարցազրոյցը   Այգեպարի  դպրոցի տնօրէն Արեւիկ Արզումանեանի հետ է:

–Տարիներ շարունակ   Տաւուշի սահմանամերձ գիւղերու բնակիչները ապրած եւ կ’ապրին   ազերիներուն կողմէ  մշտատեւ  կրակոցներու   վտանգի ներքոյ. տիկի՛ն Արզումանեան, բնականաբար,  այդ վտանգը կախուած  եղած է նաեւ դպրոց յաճախող անպաշտպան երեխաներու գլխուն, ինչպէ՞ս դպրոցը դիմակայած է, ինչպէ՞ս    աշակերտներուն կը նախապատրաստէք յանկարծահաս «Աստուած  մի արասցէ» աւելի լայնածաւալ  պատերազմական գործողութիւններուն:

-Բոլորս ալ գիտենք,որ Այգեպար գիւղը սահմանային ամենավտանգաւոր գօտիին մէջ գտնուող գիւղերէն մէկն է: Բնականաբար,  մեր աշակերտները դեռեւս շատ փոքր տարիքէն  նախապատրաստուած են` դիմակայելու թշնամիի մշտատեւ կրակոցներուն , անոնք գիտեն, թէ երբ  վտանգաւոր է, երբ պէտք է պատրաստուին  եւ ուր: Դպրոցէն ներս յաճախակի կ’իրականացուին նախապատրաստական ձեռնարկներ:

–Կ’ըլլա՞ն դէպքեր, երբ ծնողները ընդհանրապէս  երեխաները դասի չուղարկեն` վախնալով թշնամիին կողմէ գիւղին վրայ ինկող արկերէն, դիպուկահարներու կրակոցներէն, ի՞նչ աշխատանքներ կը տարուին ծնողներուն հետ:

-Այդպիսի դէպքեր հազուագիւտ կը հանդիպին` 1-2 ծնող. Հիմնականին մէջ երեխաները պարտաճանաչ կը յաճախեն դպրոց, որքան ալ որ նախորդ օրը կրակոցներ  եղած ըլլան: Ի հարկէ, ծնողներուն հետ աշխատանքներ կը տարուին, անոնք գիտեն կրակոցներու ժամանակ ինչպէս վարուիլ:

–Դուք կ’ապրիք ատրպէյճանական դիրքերուն շատ մօտ. այսինքն` ամէն գիշեր ու ամէն առաւօտ ` կեանքի ու մահուան անկանխատեսելի   սահմաններու մէջ. երբեւէ չէ՞ք մտածած Ձեր բնակատեղին լքելու մասին:

-Կ’ուզէք հաւատաք, կ’ուզէք` ոչ, Այգեպար ապրող իւրաքանչիւր բնակիչ շատ դժուարութեամբ կը հեռանայ գիւղէն, այն ալ ոչ թէ կրակոցներու պատճառով, այլ աւելի շատ աշխատանք չունենալու եւ ընտանիքը պահել չկարողանալու պատճառով:

–Տիկին Արզումանեա՛ն, ուրկէ՞  կու գայ  տաւուշցիի`   այդչափ  հայրենասէր, իր հողին կառչած ըլլալու   անսահման ներուժը:

-Մեր չքնաղ բնութիւնը, մեր նախնիներու  օրինակը եւ դաստիարակութիւնը  տուած է մեզի այդ անսահման ներուժը:

– ինչպիսի վնասնե՞ր  կրած է Այգեպարի դպրոցը ատրպէյճանական դիրքերէն արձակուած կրակոցներուն հետեւանքով  եւ   երեխաներու յաճախելն ու տունդարձը  հնարաւորինս ապահովելու համար ի՞նչ միջոցներ  կը կիրառուին` պատնէշներ,  քարաշեղջեր….

-Այգեպարի դպրոցը ամբողջութեամբ տեսանելի է թշնամիի դիտակէտերէն  եւ կը գտնուի մշտական թիրախի տակ, դպրոց  յաճախելը  աշակերտներուն եւ ուսուցիչներուն համար միշտ ալ վտանգաւոր եղած է: ՀՕՖ-ի  հայաստանեան գրասենեակի ջանքերով դպրոցի տարածքին մէջ գիւղամիջեան  ճանապարհներու երկայնքով կառուցուած են պաշտպանական պատեր` աշակերտներուն եւ բնակիչներուն անվտանգութիւնը ապահովելու նպատակով:

–Ինչ բանի կարի՞ք ունի  սահմանամերձ Այգեպարի դպրոցը:

-Առաջին հերթին` խաղաղութիւն: Տէ, ի հարկէ, խնդիրներ շատ կան դպրոցին մէջ, այս հարցով մտահոգուած ենք:

Հարցազրոյցը`   Կարինէ Աւագեանի