Մայիս 30-ին ՀՀ սփիւռքի նախարար Հրանոյշ Յակոբեան ընդունեց փորթորիքացի երգիչ Տանիէլ Տեքըրը, որ յայտնի է Հայաստանի եւ հայերու հանդէպ ունեցած իր իւրայատուկ սիրով ու համակրանքով, եւ մասնաւորապէս, Արա Գէորգեանի «Ատանա» երգի բարձրարուեստ կատարումով, որմով ան բազմիցս հանդէս  եկած է Հայաստանի եւ արտերկրի մէջ:

 Ողջունելով երգիչը` նախարար Հրանոյշ Յակոբեան հետաքրքրուեցաւ անոր  ստեղծագործական ծրագիրներով եւ հայաստանեան այցի նպատակներով:

 «Ամէն այցելութենէ ետք` աւելի ու աւելի կը սիրեմ Հայաստանը»,- անկեղծօրէն պատասխանեց Տանիէլ Տեքըրը` աւելցնելով, որ ցանկութիւն ունի շարունակելու իր ստեղծագործական ծրագիրները հայ երգիչներու եւ ստեղծագործողներու համագործակցութեամբ: Ան նախարարին տեղեկացուց, որ 2010 թուականին թողարկած «Հայ եմ իմ ընտրութեամբ» ձայնասկաւառակը մեծ յաջողութիւն  ունեցած է ունկնդիրներուն մօտ եւ ներկայիս կը նախապատրաստուի իրականցնել հայկական երգերու նոր ձայնագրութիւններ`  հանդէս գալով Շուշան Պետրոսեանի, Լէյլա Սարիբեկանի եւ հայկական կատարողական արուեստի այլ ներկայացուցիչներու հետ:  Երգիչը շեշտեց, որ այդ ձեւով կը փորձէ իր զօրակցութիւնը յայտնել հայ ժողովուրդին եւ լայն հասարակայնութեան ծանօթացնել անոր մշակոյթն ու պատմութիւնը, ինչպէս նաեւ հայութիւնը յուզող խնդիրներուն:

 Նախարար Հրանոյշ Յակոբեան շնորհակալութիւն յայտնեց Տանիէլ Տեքըրին իր անկեղծ նուիրումին համար` ընդգծելով, որ ներկայ փուլին, երբ ատրպէյճանական պաշտօնական շրջանակները ակնյայտ հակահայկական քարոզչութիւն կը տանին եւ ատելութիւն կը սերմանեն, կարեւոր է մշակոյթի միջոցով հայ ժողովուրդի իրական որակները բացայայտելը:

 Զրոյցին ընթացքին քննարկուեցան երգիչի ստեղծագործական ծրագիրներու իրականացման հնարաւորութիւններուն առնչուող հարցեր: