Ամերիկայի Հայ Դատի յանձնախումբը հրապարակեց Քալիֆորնիոյ մէջ Յունիս 7-ին, իսկ Նեւատայի մէջ Յունիս 14-ին կայանալիք Քալիֆորնիոյ եւ Նեւատայի քոնկրեսական նախնական ընտրութիւններուն իր զօրակցութիւնը ապահոված թեկ-նածուներուն ցանկը՝ լուսարձակի տակ առնելով այն քաղաքական գործիչները, որոնք հայանպաստ կեցուածքներով փաստած են, որ հայութեան եւ Հայաստանի բարեկամներ են։

«Արեւմտեան Ամերիկայի Հայ Դատի յանձնախումբը շնորհակալութիւն կը յայտնէ Միացեալ Նահանգներու Ծերակոյտի եւ Ներկայացուցիչներու տան այն անդամներուն, որոնք նեցուկ կը կանգնին ամերիկահայութիւնը յուզող հարցերուն։ Նշեալ ցանկին վրայ գտնուողները Արցախի ինքնավարութիւնը ապահովելու, Հայոց Ցեղասպանութեան ճանաչման եւ Հայաստան-Ամերիկա յարաբերութիւնները սերտացնելու գծով յստակ զօրակցութիւն ցուցաբերած են՝ արժանանալով մեր աջակցութեան», կը յայտնէ Արեւմտեան Ամերիկայի Հայ Դատի յանձնախումբի ատենապետ Նորա Յովսէփեան։ «Ուրախ ենք զօրակցելու յատկապէս Խաչօ Աշաճեանին եւ Տենի Թարխանեանին, որոնց յաղթանակները պիտի կրկնապատկեն Քոնկրեսի մէջ ամերիկահայութեան ներկայութիւնը», կ՛աւելցնէ ան։

Խաչօ Աշաճեան թեկնածու է Քալիֆորնիոյ քոնկրեսական 24րդ ընտրատարածքի ընտրութեանց, մինչ Տենի Թարխանեան՝ Նեւատայի քոնկրեսական 3րդ ընտրատարածքի ընտրութեանց։ Ներկայիս, Քոնկրեսի հայ անդամներն են Աննա Էշու եւ Ճեքի Սփիր, երկուքն ալ՝ Քալիֆորնիայէն։

Ամերիկայի Հայ Դատի յանձնախումբին յանձնարարականները կատարուած են համագործակցութեամբ շրջանի Հայ Դատի յանձնախումբին եւ տեղական մասնաճիւղերուն, նկատի ունենալով հայութիւնը յուզող հարցերուն շուրջ թեկնածուներու կեցուածքներն ու անոնց անցեալի գործունէութիւնը։

Ամերիկայի Հայ Դատի յանձնախումբը կոչ կ՛ընէ հայութեան, որ աշխոյժ մասնակցութիւն բերէ այս ընտրութիւններուն։ Անոնք, որոնք ցարդ չեն արձանագրուած քուէարկութեան կամ յաւելեալ տեղեկութեանց կարիքը ունին, կրնան դիմել Արեւմտեան Ամերիկայի Հայ Դատի յանձնախումբի «Հայ Վոթս» յանձնախումբին՝ (818) 806-8683թիւով, կամ այցելելwww.hyevotes.org կայքը։

 Ստորեւ՝ յանձնարարուած թեկնածուներուն ցանկը.

ՔԱԼԻՖՈՐՆԻԱ. ՄԻԱՑԵԱԼ ՆԱՀԱՆԳՆԵՐՈՒ ԾԵՐԱԿՈՅՏ

Լորեթա Սանչեզ (Դ.)

ՔԱԼԻՖՈՐՆԻԱ. ՄԻԱՑԵԱԼ ՆԱՀԱՆԳՆԵՐՈՒ ՆԵՐԿԱՅԱՑՈՒՑԻՉՆԵՈՒ ՏՈՒՆ

Խաչօ Աշաճեան (Հ., 24րդ ընտրատարածք)

Ճուտի Չու (Դ., 27րդ ընտրատարածք)

Ճիմ Քոսթա (Դ., 16րդ ընտրատարածք)

Աննա Էշու (Դ., 18րդ ընտրատարածք)

Պարպարա Լի (Դ., 13րդ ընտրատարածք)

Կրէյս Նափոլիթանօ (Դ., 32րդ ընտրատարածք)

Տեւըն Նունիէզ (Հ., 22րդ ընտրատարածք)

Էտուըրտ Ռոյս (Հ., 39րդ ընտրատարածք)

Լինտա Սանչեզ (Դ., 38րդ ընտրատարածք)

Էտըմ Շիֆ (Դ., 28րդ ընտրատարածք)

Պրետ Շըրմըն (Դ., 30րդ ընտրատարածք)

Ճեքի Սփիր (Դ., 14րդ ընտրատարածք)

Տէյվիտ Վալատաօ (Հ., 21րդ ընտրատարածք)

ՆԵՒԱՏԱ. ՄԻԱՑԵԱԼ ՆԱՀԱՆԳՆԵՐՈՒ ՆԵՐԿԱՅԱՑՈՒՑԻՉՆԵՈՒ ՏՈՒՆ

Տենի Թարխանեան (Հ., 3րդ ընտրատարածք)

Տինա Թայթըս (Հ., առաջին ընտրատարածք)