Ֆրանսայի նախագահ Ֆրանսուա Օլանտ Ելիսէյեան պալատին մէջ ընդունած է Հայ Առաքելական եկեղեցւոյ Ֆրանսայի թեմի առաջնորդ եպիսկոպոս Վահան Յովհաննէսեանը եւ անոր քաղաքական հարցերով խորհրդական Արթուր Խանջեանը:

Աւելի քան մէկ ժամ տեւած հանդիպման ժամանակ Վահան Յովհաննէսեան շնորհակալութիւն  յայտնած է ընդունելութեան համար, ներկայացուցած  Հայ առաքելական եկեղեցւոյ Ֆրանսայի թեմի գործունէութիւնը, բարձրացուցած ֆրանսահայութիւնը յուզող հարցեր:

Ինչպէս կը հաղորդէ «Արմէնփրէս»­-ը` վկայակոչելով Nouvelles d`Armenie­-ն, եպիսկոպոսը Օլանտին  փոխանցած է ֆրանսահայութեան ակնկալիքները Հայոց ցեղասպանութեան ժխտումը քրէականացնելու օրէնքի ընդունման հարցով, հետաքրքրուած այդ ուղղութեամբ կատարուող քայլերուն մասին եւ նշած, որ ֆրանսահայերը անհամբերութեամբ կը սպասեն այդ օրէնքի ընդունման:

Ան նաեւ Օլանտին  փոխանցած է ֆրանսահայերու մտահոգութիւնները Ատրպէյճանի կողմէ (Թուրքիոյ աջակցութեամբ) սանձնազերծուած ապրիլեան պատերազամական գործողութիւններուն շուրջ: Վահան Յովհաննէսեան խնդրած է Ֆրանսայի նախագահէն` որպէս ԵԱՀԿ Մինսքի խումբի համանախագահող երկրի եւ ՄԱԿ­ի անվտանգութեան խորհուրդի անդամի, պահանջել Ատրպէյճանէն յարգել հրադադարի կարգը եւ ստիպել անոր ընդունիլ Լեռնային Ղարաբաղի հայերու իրաւունքները` ապրելու իրենց պապենական հողերուն վրայ: