Այսօր Սթրազպուրկի մէջ մեկնարկեց Եւրոպայի խորհրդի խորհրդարանական վեհաժողովի գարնանային նստաշրջանը, որ պիտի տեւէ մինչեւ Ապրիլ 22: Հայաստանի պատուիրակութեան անդամները ԵԽԽՎ բոլոր խմբակցութիւններուն կը բաժնեն Ատրպէյճանի կողմէ կատարուած պատերազմական յանցագործութիւններուն վերաբերեալ պատրաստուած գրքոյկներ, որոնց մէջ ներկայացուած են Ատրպէյճանի կողմէ տարեց մարդոց սպանութիւնները, զինուորի գլխատումը, երեխաներու սպանութիւնները: ՀՀ պատուիրակութեան անդամներուն այս քայլը զայրացուցած է Ատրպէյճանի պատուիրակութեան անդամները:

Սթրազպուրկի մէջ Panorama.am-ի թղթակիցին ՀՀ պատուիրակութեան անդամ Նայիրա Զոհրաբեան ըսած է, որ ինք այս գրքոյկները բաժնած է Եւրոպայի պահպանողականներու խմբակցութեան մէջ եւ զայն յանձնած է ինչպէս Թուրքիոյ, այնպէս ալ Ատրպէյճանի պատուիրակութեան անդամներուն` որոնց մէջ Ատրպէյճանի պատուիրակութեան նախագահ Սամադ Սէյիդովին:

«Սէյիդովը, ի հարկէ, սկսաւ աղմուկ բարձրացնել, որ ես կանոնակարգ կը խախտեմ եւ պէտք է արգիլուի առանց  քարտուղարութեան իմացութեան որեւէ տեղեկատուութեան տարածումը: Սէյիդովի ելոյթէն ետք, երբ շատերը կը ցանկանային խօսիլ այս մասին, ղեկավարը ընդհատեց  եւ ըսաւ այս խմորը  շատ ջուր պիտի տանի ու նպատակայարմար չէ այս բանավէճը բանալ»,- ըսած է Նայիրա Զոհրաբեան:

ՀՀ պատուիրակութեան անդամը ըսած է, որ ամբողջ նստաշրջանի ընթացքին ՀՀ պատուիրակութեան անդամները պիտի տեղեկացնեն պատգամաւորներուն եւ վեհաժողովի ընթացքին պիտի  խօսին Ատրպէյճանի կողմէ իրականացուած պատերազմական յանցագործութիւններուն մասին:

Յիշեցնենք, որ ԵԽԽՎ օրակարգէն հանուեցաւ Ղարաբաղեան թեման, որուն փոխարէն ընդգրկուեցաւ Փանամա թուղթերուն վերաբերեալ հարցը, որուն քննարկումը, ըստ օրակարգին, նախատեսուած է այսօր: