Պուլկարիոյ հայերու միութիւնը յայտարարութիւն  տարածած է, ուր Միութեան նախագահ պարոն Յարութիւն Յովսէփեան խստօրէն կը դատապարտէ Ատրպէյճանի ահաբեկչական գործողութիւնները Լեռնային Ղարաբաղի Հանրապետութեան մէջ: «Հայերն այսօրի» փոխանցմամբ` յայտարարութեան մէջ մասնաւորապէս ըսուած է.

«Պուլկարիոյ հայերու միութիւնը խստօրէն կը դատապարտէ ս.թ. Ապրիլ 2-ին սկսած Լեռնային Ղարաբաղի Հանրապետութեան սահմաններու ամբողջ երկայնքով օդային զինուժի, ծանր հրետանիի եւ զրահամեքենաներու կիրառութեամբ Ատրպէյճանի լայնամածաւալ ռազմական յարձակումները, որոնք աննախադէպ էին 1994թ. հաստատուած հրադադարէն ի վեր:

Յարձակումներուն զոհ  դարձած են եւ վիրաւորուած տասնեակ զինուորականներ եւ քաղաքացիական անձիք, որոնց մէջ նաեւ երեխաներ: Այս առիթով Պուլկարիոյ հայերու միութիւնը իր խոր վշտակցութիւնը կը յայտնէ անմեղ զոհերու հարազատներուն ու մերձաւորներուն եւ կը կիսէ կորուստի ցաւը:

Ցաւօք միջազգային հանրութիւնը Լեռնային Ղարաբաղի հակամարտութեան վերաբերեալ իրենց կոչերուն մէջ կը շարունակէ հաւասարութեան նշան դնելու կողմերուն միջեւ, խուսափելով հասցէական քննադատութենէ եւ զսպուածութեան հաստատակամ կոչեր ընելու Ատրպէյճանին: Կ’անտեսուի այն հանգամանքը, որ հէնց Ատրպէյճանի ղեկավարութիւնը  մշտապէս ու հետեւողականօրէն հանդէս եկած է ռազմատենչ հռետորաբանութեամբ, պատերազմական կոչերով, ցեղապաշտական եւ հայատեաց քարոզով` օգտագործելով, ներառեալ, նոյն միջազգային հարթակները: 

Ուստի կոչ կ’ընենք Պուլկարիոյ իշխանութիւններուն, եւրոպական եւ միջազգային մարմիններուն վճռականօրէն դատապարտել Ատրպէյճանի սադրիչ գործողութիւնները` մարդկային տասնեակ ու հարիւրաւոր կեանքերու կորստեան համար, ներառեալ` քաղաքացիական խաղաղ բնակչութեան շրջանին մէջ:

Պուլկարիոյ հայերու միութիւնը զօրավիգ է Լեռնային Ղարաբաղի Հանրապետութեան ու անոր ժողովուրդին յանուն ազատութեան անոր պայքարին եւ խաղաղ, անվտանգ ու բարեկեցիկ երկիր կառուցելու ջանքերուն: Միաժամանակ կոչ կ’ընենք պուլկարահայ համայնքին եւ Սփիւռքի մեր հայութեան աւելի աշխուժացնել իրենց գործողութիւնները ի շահ մեր ազգին եւ Հայրենիքին»: