Նուագակցութեամբ էսթրատային եւ ժողովրդային զոյգ նուագախումբերուն, Համազգայինի առաքելութեան հաւատացող «խենթերուն» ջանքերով (ինչպէս ակնարկեց Համազգայինի Լիբանանի Շրջանային վարչութիւնը), «Այգ» երիտասարդական երգչախումբը անգամ մը եւս ելոյթ ունեցաւ կիրակի, 20 մարտ 2016-ին, երեկոյեան ժամը 7:00-ին, Պէյրութի ամերիկեան համալսարանի «Էսեմպլի Հոլ» սրահին մէջ, ի յիշատակ մեծանուն երաժշտահան Խաչատուր Աւետիսեանի ծննդեան 90-ամեակին, որ ապացոյցը հանդիսացած է Հայաստան-սփիւռք անքակտելի կապին: Ելոյթը ունէր իւրայատուկ յայտագիր` ընդգրկելով Խաչատուր Աւետիսեանի, Շարլ Ազնաւուրի, Թաթուլ Ալթունեանի, Ռուբէն Հախվերտեանի եւ Պիթըլզի ստեղծագործութիւնները, խմբավարութեամբ` Զաքար Քէշիշեանի: Դաշնակի ընկերակցութեամբ դաշնակահար Լիանա Յարութիւնեանի:

Ելոյթը հիասքանչ էր: Ինչպէս միշտ, «Այգ»-ը անգամ մը եւս դիւթեց ունկնդիրները` ստեղծելով երաժշտական գեղեցիկ երեկոյ մը:

Բացման խօսքը անդրադարձաւ Պէյրութի ամերիկեան համալսարանի հիմնադրութեան 150- ամեակին, ապա երաժշտահան Խաչատուր Աւետիսեանի ծննդեան 90-ամեակին, նաեւ ջերմ շնորհակալական խօսքեր ուղղուեցան խմբավար Զաքար Քէշիշեանին, դաշնակահար Լիանա Յարութիւնեանին եւ ամբողջ աշխատակազմին ու անդամներուն, ինչպէս նաեւ Համազգայինի Լիբանանի Շրջանային վարչութեան, բարերարներուն եւ ծնողներուն:

Յայտագիրը սկսաւ Շարլ Ազնաւուրի երգերով, ապա շարունակուեցաւ Ռուբէն Հախվերտեանի հիասքանչ երգերու շարքով` սրինգի ընկերակցութեամբ: Երգչախումբին միացաւ ժողովրդական նուագախումբը` ներկայացնելով «Կենաց երգ», «Հոյ նազան եար», «Էրզրումի շորոր», «Սրտիկ մալուլ մի մնա», «Կռունկներ», «Իրիկնային», «Իմ աղէկ» եւ «Հազարաթ եւ Հայաստան» երգերը:

Պիթըլզի երգերով շարունակուեցաւ ելոյթը, որուն աւարտին բուռն ծափահարութիւններով եւ ծաղկեփունջերով գնահատուեցաւ խմբավար Զաքար Քէշիշեան, որ խանդավառելով հանդիսատեսը կամուրջ մը ստեղծեց ժողովուրդին եւ երաժշտութեան միջեւ:

Այս մասին կը յայտնէ Ազդակ: