Թուրքիոյ Արտուին նահանգին մէջ հանքաարդիւնաբերական կեդրոն կառուցելու դէմ դուրս եկած բնապահպաններու,  քաղաքական գործիչներու ու հազարաւոր քաղաքացիներու բողոքի ցոյցերը ցրելու համար իշխանութիւնները արտակարգ դրութիւն  յայտարարած են:

Թրքական Sozcu պարբերականի փոխանցմամբ`  թրքական իշխանութիւնները մեծ թիւով ոստիկաններ ու ոստիկանութեան զինծառայողներ  տեղափոխած են Արտուին, որմէ յետոյ փակած են Արտուին մտնող ու դուրս եկող ճանապարհները:

news.am-ի փոխանցմամբ` կը նշուի, որ Թուրքիոյ տարբեր վայրերէ Արտուինի բնութիւնը պաշտպանելու համար հանրակառքերով դէպի Արտուին կը մեկնին բազմաթիւ քաղաքացիներ, որուն  դէմը առնելու համար իշխանութիւնները որոշած են արտակարգ դրութիւն յայտարարել` խուսափելու համար ոստիկանութեան ու քաղաքացիներու միջեւ բախումներէն:

Նշենք, որ Արտուինի մէջ մետաղներու արդիւնահանման համար նախատեսուած է անտառներու հատում, որ կատղեցուցած է տեղի բնակչութիւնը ու բազմաթիւ բնապահպաններու: