Թուրքիոյ քրտամէտ «Ժողովուրդներու դեմոկրատական կուսակցութեան» (ԺԴԿ-HDP) հայ պատգամաւոր Կարօ Փայլան խորհրդարանէն ներս բարձրացուցած է ազգային փոքրամասնութիւններու դպրոցներու խնդիրը: Թրքական «Habervaktim.com» լրատուակայքի տեղեկացմամբ` Թուրքիոյ ազգային մեծ ժողովի (ԹԱՄԺ-TBMM) նախագիծերու  եւ պիւտճէի յանձնաժողովի նիստի ժամանակ Փայլան առաջարկած է վերաբանալ Սթամպուլի Հէյպելիատա կղզիի յունական հոգեւոր դպրոցը:

«Միթէ՞ դեռ չէ եկած այն օրը, որ քաղաքացիի պէս վերաբերինք այստեղի հայուն, ասորիին, յոյնին, հրեային: Կ’ըսէք, թէ կ’ուզէք հաւատացեալ հասարակութիւն մեծցնել,- ատիկա պարոն նախագահի նախաձեռնութիւնն է,- ուրեմն թոյլ տուէք, թող յոյներն ալ հաւատացեալ հասարակութիւն դաստիարակեն: Ինչու՞ ոչ»,-ըստ Ermenihaber-ի`  ըսած է Փայլան:

Թուրքիոյ ԱԳ նախարար Մեւլութ Չաւուշօղլուն հոգեւոր դպրոցներու խնդիրին աջակցած է Փայլանին. «Ես կը միանամ, թող բացուի», -ըսած է ան: Սակայն միեւնոյն ժամանակ ընդգծած է, թէ նշեալ խնդիրը ԱԳ նախարարութեան իրաւասութիւններուն մէջ չի մտներ, խնդիրը պէտք է համաձայնեցնել կրթութեան նախարարութեան հետ:

Փայլան օրակարգ  բերած է նաեւ ազգային փոքրամասնութիւններուն պատկանող դպրոցներու կարգավիճակի խնդիրը: Այդ հաստատութիւնները ներկայիս ոչ պետական դպրոցներ են, ոչ մասնաւոր: Ըստ հայ պատգամաւորի` ֆինանսներու նախարարութիւնը կը պնդէ, թէ ազգային դպրոցները պէտք է ձեւակերպուին որպէս առեւտրային կազմակերպութիւններ, մինչդեռ այդ դպրոցները վճարովի չեն եւ անոնց  կոչումը ազգային դպրոց եւ ազգային հիմնադրամ ըլլալն է: