Ֆրանսահայ աշխարհահռչակ շանսոնյէ Շառլ Ազնաւուր   Փետրուար 12­-ին  համերգով   հանդէս   կու գայ   Տուպայի համաշխարհային կեդրոնի համերգասրահին մէջ:

Ինչպէս   կը   հաղորդէ   «Արմէնփրէս»­-ը,  համերգէն   առաջ   արաբական   The Nationa-l­ին   տուած  հարցազրոյցին Ազնաւուր ըսած է,   որ   իր   արուեստական տաղանդը զարգացած է արուեստասէրներու ընտանիքի մէջ, որ չունէր շատ ֆինանսական միջոցներ,   սակայն   հարուստ   էր   սիրով   ու   հոգատարութեամբ:   «Ես շատ   ուրախ   եմ,   որ  կեանքիս մէջ գտած եմ  իմ կոչումս, հանդիպած հետաքրքիր մարդոց, որոնք իմ մէջ խթանած են հետաքրքրասիրութիւնը»,­ըսած է Շառլ Ազնաւուր:

Պարբերականը   կը   շեշտէ,  որ 91 տարեկանին Ազնաւուր նկարահանուած է արդէն 60 ֆիլմի մէջ, գրած աւելի քան 1200 երգ, կ’երգէ 8 լեզուներով եւ  վաճառած  է աւելի քան  180 մլն  ձայնագրութիւն:   «Իմ  արուեստիս  հիմքին   մէջ ինկած է հայկական մշակոյթը, սակայն իմ սրտիս եւ իմ   լեզուիս  երկիրը  Ֆրանսան է:   Յոյսով  եմ, որ Հայաստան ի վերջոյ   կ’ապրի խաղաղ,  իր  սահմաններուն  հետ  կապուած   բոլոր   խնդիրները  կը լուծուին»,  ­ըսած է Ազնաւուր:

1975 թուականին, ան գրած է   «Անոնք ինկան»   երգը`   նուիրուած   Հայոց ցեղասպանութեան 60-­ամեակին:   2008 թուականին Ազնաւուր ստացած է Հայաստանի քաղաքացիութիւն եւ նշանակուած   Զուիցերիոյ մէջ ՀՀ արտակարգ եւ լիազօր դեսպան: