ԱՄՆ Ռոտ Այլենտ նահանգի մայրաքաղաք Փրովիտենսի մէջ Սբ. Սահակ եւ Մեսրոպ Հայ եկեղեցւոյ մշակութային կոմիտէն, Ռոտ Այլենտի յիշատակի կոմիտէն եւ Հայ փախստականներու սոցիալ-տնտեսական զարգացման ընկերակցութիւնը (ARSEDA) Յունուար 16-ին կազմակերպած են «Մէկ դար տեւած ցեղասպանութիւն: Ցուցադրուած է «Պաքուի սեւ Յունուարը» վերնագիրով վաւերագրական ֆիլմը:

ԼՂՀ ԱԳ նախարարութեան տեղեկատուական վարչութեան փոխանցմամբ` ձեռնարկին, որ նուիրուած էր Ատրպէյճանի մէջ հայկական ջարդերու տարելիցին, մասնակցած են ԱՄՆ-ի մէջ Լեռնային Ղարաբաղի Հանրապետութեան Մշտական ներկայացուցիչ Ռոպերթ Աւետիսեան, նահանգային խորհրդարանի անդամ Քեթրին Կազարեան, Սբ Սահակ եւ Մեսրոպ Հայ եկեղեցւոյ ներկայացուցիչներ, լրագրողներ, Պաքուի հայ փախստականներ, տեղի հայ համայնքի ներկայացուցիչներ:

Ֆիլմի ցուցադրումէն ետք  ԱՄՆ-ի մէջ Արցախի ներկայացուցիչ Ռ․ Աւետիսեան, Ռոտ Այլենտի նահանգային խորհրդարանի անդամ Կ.Կազարեան, ARSEDA-ի ղեկավար Կարէն Բաղդասարեան, հոգեւորականներ հանդէս  եկած են ելոյթներով: Ֆիլմի ստեղծագործական խումբի անդամ Հայկարամ Նահապետեան ներկայացուցած է վաւերագրական ֆիլմի մասին մանրամասներ:

ԱՄՆ-ի մէջ ԼՂՀ ներկայացուցիչ Ռ․ Աւետիսեան ելոյթէն ետք պատասխանած է ներկաներու հարցերուն, որոնք կը վերաբերէին ատրպէյճանա-ղարաբաղեան հակամարտութեան, բանակցային գործընթացին եւ փախստականներու խնդիրներուն: