Համաշխարհային ճանաչում ունեցող փաստաբան Ամալ Քլունին առաջարկած է ստանձնել ատրպէյճանցի լրագրող Խատիճա Իսմայլովայի գործը, որ արդէն ուղարկուած է ՄԻԵԴ:

Այս մասին, ըստ Artsakhpress-ի, կը յայտնէ «Ազատութիւն» ռատիօկայանի ատրպէյճանական ծառայութիւնը:

Իսմայլովան եւ անոր փաստաբանը այժմ կը քննարկեն առաջարկը:

Նշենք, որ Ամալ Քլունին պաշտպանած է Հայաստանի շահերը «Փերինչէքն ընդդէմ Զուիցերիոյ» գործով:

Յիշեցնենք, որ ատրպէյճանցի լրագրող Խատիճա Իսմայլովան ՄԻԵԴ  դիմած է 2015թ. Սեպտեմբերին` բողոք ներկայացնելով ապօրինի կալանքի դէմ: Անոր փաստաբան Ֆարիզ Նամազլիի խօսքով` բողոքին մէջ ներկայացուած են անոր իրաւունքներու ոտնահարումները հետեւեալ յօդուածներով` 5-րդ (ազատութեան եւ անձեռնմխելիութեան իրաւունք), 6-րդ (անաչառ դատական գործընթացք), 10-րդ (խօսքի ազատութեան իրաւունք) եւ 18-րդ (Իրաւունքներու սահմանափակման  մասին պայմանադրութեամբ նախատեսուած սահմաններու բարձրացման անթոյլատրելիութիւն):