Գամիշլիի մեր թղթակից Յակոբ Սրկ. Պարսումեան կը տեղեկացնէ, որ հակառակ Գամիշլիի մէջ տիրող աննպաստ պայմաններուն տեղւոյն հայերը հովանաւորութեամբ Ճէզիրէի Առաջնորդական Փոխանորդ Գերպ. Տ. Փա­ռէն Ծ. Վրդ. Վար­դան­եա­նի արժանավայել կերպով նշած են Ս. Ստեփանոս Նախասարկաւագի ու Աստուածայայատնութեան հրաշալի տօները, ուր յաւուր պատշաճի տեղի ունեցած է Ս. եւ Անմահ Պատարագ:

Ս. Ծննդեան տօնին առիթով, Մեծի Տանն Կիլիկիոյ արժանընտիր գահակալ ՆՍՕՏՏ Արամ Ա. Կաթողիկոս հեռաձայնային հաղորդակցութեամբ շնորհաւորած է Գամիշլիահայութիւնը եւ մաղթած խաղաղ ու բարեբեր օրեր: Ինչպէս նաեւ Բերիոյ Հայոց Թեմի Առաջնորդ Գերշ. Տ. Շահան Ս. Արք. Սարգիսեան վերոնշեալ զոյգ առիթներով դարձեալ շնորհաւորական հաղորդակցութիւն ունեցած է շրջանի հոգեւոր Հօր հետ եւ իր սրտագին բարեմաղթութիւններուն կողքին զօրակցութիւն յայատնած է Գամիշլիի հայրենասէր, ազգայնասէր, քաջարի ու խիզախ ժողովուրդին եւ մաղթած անոնց արեւշատութիւն ու անվտանգ օրեր, կարենալ ձեռնհասութեամբ ղեկավարելու գաղութի յառաջիկայ ծրագիրները:

Այս մասին կը յայտնէ Գանձասար: