Դեկտեմբեր 10-ին ՀՀ սփիւռքի նախարարութեան աջակցութեամբ տեղի ունեցաւ Ճարտարապետներու եւ ճարտարագէտներու համահայկական ընկերակցութեան (ՃՃՀԱ) «Հայկական պար եւ հայկական ճարտարապետութիւն» ձեռնարկը, որուն ծիրէն ներս կայացաւ ճարտարապետ Դաւիթ Ստեփանեանի «Հայերէն խօսող յուշարձաններ» գիրքի շնորհանդէսը:

Գիրքի անգլերէն տարբերակը տպագրուած է ՃՃՀԱ-ի եւ հայերէն տարբերակը` «Կայթ» արուեստի զարգացման նախաձեռնութեան աջակցութեամբ:

Ժողովածուն նախատեսուած է  շարունակական ըլլալ եւ ասիկա առաջին հատորի տպագրութիւնն է, որ բացի հայկական շրջանակներէն, ուղղուած է նաեւ օտարազգի մասնագէտներուն` նպատակ ունենալով նպաստել հայկական ճարտարապետական ժառանգութեան մասին իրազեկման բարձրացման:

Ձեռնարկին կը  մասնակցէր ՀՀ սփիւռքի նախարարի տեղակալ Վահագն Մելիքեան:

Ողջոյնի խօսքերով հանդէս եկան Հայաստանի ճարտարապետներու միաւորման նախագահ Մկրտիչ Մինասեան եւ Ճարտարապետներու եւ ճարտարագէտներու համահայկական ընկերակցութեան համանախագահ Գոհար Թութունճեան:

Ներկայացուեցան անուանի հայ ճարտարապետներ Ռաֆայէլ Իսրայէլեանի, Ճիմ Թորոսեանի, Սարգիս Գուրզադեանի ստեղծագործութեան վերլուծութիւնները, եղան բանախօսութիւններ:

Ձեռնարկը շարունակուեցաւ ազգային պարերու բաց դասով, իսկ ամենաաշխոյժ մասնակիցներուն յանձնուեցան նուէրներ: