Երեւանի Մաշտոցի անուան Մատենադարանը ամիսներ առաջ համալրուեցաւ միջազգային ճանաչում ունեցող իրանահայ հայր եւ որդի արուեստագէտներու` լուսանկարիչ Անթուան Սեւրուկինի եւ գեղանկարիչ Անտրէ Սեւրուկեանի աշխատանքներով: Նուիրատուութիւնը իրականացուցած էր վերջինի որդին` գերմանաբնակ մեր հայրենակից Էմմանուէլ Սեւրուկեան: Անոր մասնակցութեամբ գեղանկարներու եւ լուսանկարներու մեծարժէք այս հաւաքածուն վաղը կը ներկայացուի Մատենադարանի ցուցասրահին մէջ, իսկ այսօր Էմմանուէլ Սեւրուկեան հանդիպած է արուեստաբաններու ու լրագրողներու  հետ` խօսելու իր տաղանդաւոր նախնիներու հայկական ծագման մասին: «Մեծհայրս ու հայրս  աշխարհի մէջ յայտնի են որպէս պարսիկ, ռուս, վրացի, անգամ ֆրանսացի արուեստագէտներ, բայց անոնց հայկական ծագման մասին ոեւէ մէկը չի խօսիր»,- armradio.am-ի փոխանցմամբ` ըսած է Էմմանուէլ Սեւրուկեան:

Անթուան Սեւրուկին  ծնած է 1851 թուականին Թեհրան, լուսանկաչութիւն սորված`  Թիֆլիսի մէջ: Վերադառնալով Իրան ան իր առաջին  լուսանկարչատունը հիմնեց Թաւիզի մէջ եւ, մասնագիտական բարձր որակի շնորհիւ, մուտք գործեց արքունիք: 1883 թուականին  Անթուան Թեհրանի մէջ հիմնեց իր  երկրորդ լուսանկարչատունը:

Հիանալի դիմանկարներու շնորհիւ դարձաւ  Նասեր Էտ-Տին շահի պալատի բարձրաստիճան  լուսանկարիչը` արժանանալով նաեւ «Խան» տիտղոսին:

Անթուանի որդին` Անտրէ Սեւրուկեան, եւս ծնած էր Իրան: Ինչպէս լուսանկարիչ Անթուան Սեւրուկին, այնպէս ալ անոր գեղանկարիչ որդին միջազգային համբաւ վայելող արուեստագէտ էր: Անոնց աշխատանքները կը ցուցադրուին աշխարհի ամենայայտնի թանգարաններուն մէջ: Սեւրուկիններու ինքնատիպ արուեստի մասին գրուած են բազմաթիւ ուսումնասիրութիւններ, հրատարակուած  ալպոմներ:

«Երբեւէ չէ նշուած անոնց հայկական ծագման մասին: Անոնց կը համարեն ռուս, պարսիկ, վրացի, ֆրանսացի, բայց իրականութեան մէջ անոնք հայեր են»,- կ’ըսէ արուեստաբան Իւետ Թաճարեան, որ եւս ծնած է Իրան, բայց արդէն երկար տարիներ կ’ապրի Հայաստան եւ շուրջ 20 տարի կ’ուսումնասիրէ  Սեւրուկին գերդաստանի պատմութիւնը:

Անտրէ Սեւրուկեանի որդին` Էմմանուէլ Սեւրուկեան այսօր պատմեց, որ 1935 թուականին ընտանիքը Իրանէն տեղափոխուած է Աւստրիա, իսկ աւելի ուշ Գերմանիա, ուր ալ  ան այժմ կ’ապրի եւ կ’աշխատի:  Հայր եւ որդի Սեւրուկեաններու մշակութային ժառանգութիւնը այսօր տարածուած է աշխարհով մէկ: Ամենամեծ հաւաքածուն կը պահպանուի Ուաշինկթընի հեղինակաւոր թանգարաններէն մէկուն մէջ, իսկ Սեւրուկեաններու ընտանեկան հաւաքածուն Էմմանուէլ Սեւրուկեան ամիսներ առաջ նուիրաբերեց Երեւանի Մատենադարանին:  Գեղանկարներու եւ լուսանկարներու մեծարժէք այս հաւաքածուն վաղը կը ներկայացուի հայրենիքի մէջ: