ՀԲԸՄ-ՀԵԸ –ի «Արին»  համոյթը  ժողովրդային  լայն ճանաչում վայելող  պարախումբ դարձած է այսօր: Մեծ է «Արին» պարախումբին ներդրումը պարարուեստի զարգացման եւ  պահպանման գործին: «Արին» պարախումբը  անաղարտ  եւ վառ  կը պահէ  հայ ազգային մշակոյթը եւ հայ պարի ոգին: «Արին»ը լիբանանահայ  մշակութասէր   հանրութեան ներկայացաւ ճոխ եւ հմայիչ յայտագիրով: Անոր ելոյթները անգամ մը եւս  եկան ապացուցելու  հանդիսատեսին հետ ստեղծուած  հոգեկան անքակտելի կապը:

Յաջորդական երեք օր՝  շաբաթ, կիրակի եւ երկուշաբթի,  14,15,16  Նոյեմբեր  2015, (երկու  երեկոյթ, մէկ աշակերտական), ՀԲԸՄ-ՀԵԸ-ի  կեդրոնական վարչութեան  հովանաւորութեամբ,  ՀԲԸՄ-ՀԵԸ  « Արին»  պարախումբը,  պարուսոյց,   գեղարուեստական  ղեկավար Գայիանէ Մածունեանի  գլխաւորութեամբ, «էմիլ  Լահուտ»ի  անուան Համագումարներու պալատին մէջ  համախմբուած մշակութասէր   հասարակութեան ներկայացուց  ազգագրական, ազգային, ժողովրդային պարերու նոր փունջ մը:  Զուտ հայկական հնչերանգներով հարստացած  պարերը  ունէին դիմագիծ եւ ոճ: Հանդիսատեսը  ըմբոշխնեց    հայկական պարերու տարաբնոյթ եւ երփներանգ  նմուշներ: Այնտեղ էին հանդարտ պարն ու  եռանդունը, նազանին ու առնականը, ռազմականն ու  քնարականը:

Շաբաթ , 14 Նոյեմբեր  2015-ի երեկոյեան, ի ներկայութիւն՝ հաճելի անակնկալով մը Լիբանան ժամանած ՀԲԸՄ-ի  նախագահ  Պերճ Սեդրակեանի, Լիբանանի մօտ Հայաստանի արտակարգ  եւ  լիազօր  դեսպան Աշոտ Քոչարեանի, Լիբանանի մօտ Հայաստանի դեսպանատան հիւպատոս Աշոտ Վարդանեանի, ՀԲԸՄ-ի  Լիբանանի  Շրջանակային  Յանձնաժողովի ատենապետ  Ժեռար Թիւֆենքճեանի եւ անդամներ, ՀԵԸ-ի Կեդրոնական Վարչութեան ատենապետ  Վիգէն Չերչեանի եւ անդամներ, Լիբանանի մշակոյթի  նախարար  Ռէմոն Արաքճիի  ներկայացուցիչ Միշէլ Տիւ Շատարեւեանի, ներկայ եւ նախկին նախարաներ, երեսփոխաններ  Ժան  Օղասապեանի, Յակոբ Գասարճեանի , Շանթ Չինչինանի, Ղասան Մուխայպէրի, Փանոս Մանճեանիի,  ՀԲԸՄ-ի եւ ՀԵԸ-ի  նախկին վարչական ղեկավարներ Աւետիս Տէմիրճեանի,Կարօ Ճըղլեանի, Նար Խաչատուրեանի, շարք մը  միութենական  պատասխանատուներու,կրթական մշակներու, մտաւորականներու, արուեստասէր  հասարակութեան «Արին» պարախումբը սկսաւ իր փառահեղ ելոյթներուն:

Երեկոյի   բարի գալուստի  խօսքը (հայերէն եւ արաբերէն)  արտասանեց Արազ Չերչեան: Ան ըսաւ, թէ  պարարուեստը  կ’արտայայտէ  ժողովուրդներու  քաղաքակրթութեան աստիճանը  եւ պարն է  միակ մշակոյթը, որ կատարելապէս  կը ներդաշնակէ անհատի   հոգին  եւ մարմինը:  « Պարարուեստի   շնորհիւ ՀԵԸ-ի  մեծ ընտանիքը  կը  ձգտի պահպանել   մեր ազգային  նկարագիրը, հայկական ինքնութիւնը: ՀԵԸ-ի «Արին» պարախումբը միաժամանակ   հայեցի դաստիարակութիւն  կը  ջամբէ  հայ երիտասարդ-երիտասարդուհիներուն  եւ կը նպաստէ   հայ  մշակոյթի, երգարուեստի  ծանօթացման»,- յայտնեց Արազ Չերչեան՝ շեշտելով, որ  ՀԵԸ-ի  «Արին» պարախումբը   կը մնայ   հարազատ արժէքներու այն  համակարգին, որ  բնորոշ է հայ ժողովուրդին եւ  նախանձախնդիր  կը մնայ   պահպանելու   համաշխարհային մշակոյթի մէջ հայ ժողովուրդին վերապահուած  դիրքը: «Հայոց ցեղասպանութեան 100-ամեակի տարուան զուգադիպող սոյն ելոյթը մեր հոգիներուն մէջ կը վերակենդանացնէ մեր աւանդութիւնները, կենցաղը, սովորութիւնները եւ մեր դարաւոր մշակոյթը».  եզրակացուց Արազ Չերչեան:

«Արին« պարախումբը  ներկաները Արեւմտահայաստանէն  փոխադրեց դէպի վերածնունդ՝ նորանկախ Հայրեինք: «Արին»ը ներկայացուց հայ  ժողովուրդի աւանդութիւնները, կենցաղը եւ առօրեան արտայայտող պարեր:18 պարեր ընդգրկող, երկու արարներու բաժնուած   ելոյթները  երազի նման անցան: Հանդիսատեսը  երկու ժամ մագնիսացած անհամբեր կը հետեւէր  զիրար  գերազանցող  պարերու յաջորդականութեան:

«Արին»ի ներկայացումները միաժամանակ դարձան հայ պարարուեստի  տօն: Ժողովուրդը   յաճախ կը միանար  պարախումբին, կարծէք բոլորը պարելու ժամադրուած  ըլլային…: Ներկաները  ջերմ խանդավառութեամբ  ողջունեցին եւ  քաջալերեցին պարախումբը:  Պարերու ետին  ցուցադրուող  տեսաերիզները

 «Արին» պարախումբին  բեմադրութիւնները  շարժեցին  հանդիսատեսին միտքն ու հոգին: Ներդաշնակ ու համաչափ պարաքայլերը, պարմանուհիներուն  նազանքն ու ճկունութիւնը, տղոց  խոյանքը  արտայայտող հպարտաքայլ շարժուձեւերը, ռազմապարերը լիացուցին պարարուեստի հանդէպ  հանդիսատեսին ծարաւը:  Բեմի  հարթութեան ներդաշնակ պարողներու  թուաքանակը, պարերուն  համահունչ  գեղեցիկ տարազները, պարային, բեմադրական, լսատեսողական  ձեւաւորումներու յաջող համադրումը, պարողներու  կատարողական պատրաստուածութիւնը, դիւթող երաժշտութիւնը  յաղթական  ելոյթներու   ապացոյց  էին:  Յայտագիրին  կառուցուածքը զուտ հայկական՝ փոքրիկներէն մինչեւ  երէց, աւելի քան  140 պարող-պարուհիները  կը հետապնդէին հայկական պարը  ճիշդ խողովակներով հասցնել  մեր երիտասարդութեան, որպէսզի անոնք առողջ կերպով  դաստիարակուին հայկական  պարարուեստի  իւրայատկութիւններով եւ  չտարուին  մակերեսային մշակոյթի  մոլութեամբ:

Յատագիրի  առաջին   բաժինը  կ’ընդգրկէր  «Գողթան»,«Շորոր»,«Ծամերով պար»,«Քաջ տոհմի զաւակներ», «Աղջիկներու պար», «Դու ծաղիկ  ես», «Նուպար, Նուպար», «Շատախի  ռազմապար» պարերը, նաեւ՝  «Ասի  հոգեհանգիստ չէ»   Հայոց ցեղասպանութեան  100-ամեակի յիշատակին  խոհական պարը, ուր տառապանքներու տակ  բանտարկուած  ժողովուրդը կը հաւատայ իր ապագային, վերածնունդին եւ անկախութեան :  Երկրորդ  բաժինը կ’ընդգրկէր  գոյատեւման  պայքարի  դուրս ելած   «Սուրերու պար», «Հայոց գոյներ», «Հոյ նազան»,«Սարէն կու գայ», « Ռոստամ  պազի»,«Ծիրանի ծառ», «Նոքթիւրն», «Եարխուշտա»  եւ ազգագրական պարերու շարան  մը:

Ներկաներուն մէջ  ակնյայտ  համոզում  դարձած էր՝  պարուսոյցին,  պարախումբի վարչութեան հետապնդած՝ ազգային մշակոյթը պարարուեստի ճանապարհով  վառ պահելու   բծախնդիր  եւ լուրջ աշխատանքը:  Հանդիսականները խանդավառ եւ ջերմ   ծափահարութիւններով ողջունեցին պարախումբի անդամ-անդամուհիները, պարուսյոցը,  պարախումբի  վարչութեան անդամները:

Շնորհաւորական  եւ  երախտագիտութեան խօսք  ՀԲԸՄ-ի  Լիբանանի Շրջանակային վարչութեան,  ՀԵԸ-ի Կեդրոնական Վարչութեան եւ «Արին» պարախումբի  վարչութեան ատենապետ  Անի Պոտրումեանի եւ անդամներուն: Ո՞վ կրնայ  մոռնալ ամիսներու վրայ երկարող պախարումբի վարչութեան անդամներուն  սիրայօժար եւ տքնաջան աշխատանքը: Պարախումբի վարչութիւնը աշխատանքին  չի վերաբերիր իբրեւ պար, այլեւ՝ ազգային նկարագիր պահպանելու  ազգային   ինքնութեան գաղափարախօսութիւնը տարածելու  միջոց: Շնորհակալական խօսք  «Արին» պարախումբի  գեղարուեստական  ղեկավար, վաստակաշատ  պարուսոյց, տարազներու ձեւաւորման պատասխանատու՝ Գայիանէ Մածունեանին, որ   միշտ կը ջանայ մատուցել իր լաւագոյնը: Շնորհակալութիւն՝ տեսալսողական  ազդեցութիւններու  ձեւաւորման եւ  որմազդներու  պատասխանատու վարդան Մկրտիչեանին: Շնորհակալութիւն հանդիսութիւններու պատրաստութեան եւ  յաջողութեան սատարող բոլոր  մարմիններուն, հաստատութիւններուն, անհատներուն, բարեկամներուն  եւ պարախումբի անդամներուն  ծնողած:

Ազգային պարարուեստի հարազատ  պատկերները  համակարգուած եւ  մաքրազտուած հայկական երաժշտութիւնը, հայկական պարերու  նոր մեկնաբանութիւնները, անկասկած նոր հորիզոններ  կը բանան ՀԲԸՄ-ՀԵԸ «Արին» պարախումբին աջեւ:

Ապրին  ՀԲԸՄ-ՀԵԸ «Արին» պարախումբն   ու  իրեն  սատարող  հայորդիները: