Հայ մշակոյթի բարեկամներու հիմնարկը (Friends of Armenian Culture Society), Պոսթընի Արդի նուագախմբային ծրագիրին (Boston Modern Orchestra Project) պիտի ներկայացնէ Տիգրան Մանսուրեանի «Ռեքուիէմ»ը, որ տեղի պիտի ունենայ յառաջիկայ Հոկտեմբեր 18-ին, կէսօրէն ետք ժամը 3-ին, Նիւ Ինկլընտի երաժշտանոցի («New England Conservatory») հանրածանօթ «Ճորտըն Հոլ» սրահին մէջ: Այս մասին կը հաղորդէ ԱՄՆ-ի «Ասպարէզ» օրաթերթը։

Հայոց Ցեղասպանութեան 100-ամեակին նուիրուած այս ձեռնարկին նաեւ պիտի մասնակցին Հարվըրտ-Ռատքլիֆի երաշտանոցն ու Պոսթընի համալսարանի «Մարշ» երգչախումբը: Խմբավարն է Պոսթընի արդի նուագախմբային ծրագիրի մայէսթրօ Ճիլ Ռազ: Պոսթընի արդի նուագախմբային ծրագիրը, յատկապէս արդի երաժշտական գործեր ներկայացնող նուագախումբ մըն է, որ կը գործէ 1996-էն ի վեր:

Սոյն ձեռնարկին պիտի ներկայացուի նաեւ Ալըն Յովհաննէսի համեմատաբար աւելի քիչ ունկդրուած գործերէն «Խրիմեան Հայրիկ»ը: 1944-ին պատրաստուած է այս գործը յատուկ փողի («թրամփե»չ) եւ նուագախումբի համար է: Յայտագիրին մաս կը կազմեն Կոմիտասէն գործեր, եւ Տմիթրի Շոսթաքովիչի դաշնակի առաջին «քոնչերթօ»ն՝ մասնակցութեամբ Նարէ Աղամեանի: Յաւելեալ տեղեկութիւններու համար այցելել www.FACSBoston.org կայքը։