Այսօր Կ.Դէմիրճեանի անուան մարզահամերգային համալիրին մէջ պիտի տրուի Yerevan Jazz Fest-2015 միջազգային փառատօնի մեկնարկը, որու ծիրէն ներս պիտի կայանայ երեք համերգ` Հայաստանէն, Արցախէն, Վրաստանէն, Ֆրանսայէն, ԱՄՆ-էն, Ռուսիայէն, Աւստրիայէն եւ Լիբանանէն ժամանած երաժիշտներու մասնակցութեամբ, կը հաղորդէ Panorama.am-ը:

Լրագրողներու հետ հանդիպման ժամանակ դաշնակահար, երաժիշտ, ճազմեն Լեւոն Մալխասեան ըսած է, որ ուրախ է երկարատեւ դադարէ ետք Երեւանի մէջ կրկին միջազգային ճազ փառատօն իրականացնելու առիթով: Անոր կարծիքով, փառատօնը երեւանցիներուն պիտի հետաքրքրէ:

Ճազ միութեան նախագահ Կամօ Մովսիսեան նշած է, որ իրենց նպատակն է տարիէ տարի ընդլայնել մասնակից երկրներուն թիւը. «Բայց արդէն իսկ մեզ համար շատ կարեւոր է միջազգային ճանաչում ունեցող մարդկանց մասնակցութիւնն առաջին փառատօնին»:

Այսօր ճազ փառատօնը պիտի բանան Հայաստանի հեռուստատեսութեան եւ ռատիոյի պետական էստրադային-սիմֆոնիկ նուագախումբը (գեղ. ղեկավար` Երուանդ Երզնկեան), Արցախի ճազ նուագախումբը (գեղ. ղեկավար` Տիգրան Լալայեան), Նինոյ Կատամաձէն իր «Insight» խումբով (Վրաստան), Լորէն Ռոպինը (Ֆրանսա), Աբրահամ Գումրոյեանը (ԱՄՆ), Սերկէյ Մանուկեանը (Ռուսիա), Արթուր Սաթեանը (Լիբանան), Լեւոն Մալխասեանը, Վահագն Հայրապետեանը, Արմէն Թութունջեանը ու Կարէն Մամիկոնեանը:

Սեպտեմբեր 18-ին Մարզահամերգային համալիրի մէջ տեղի պիտի ունենայ ԱՄՆ-էն ժամանած Ռիչըրտ Պոնա խումբի համերգը: Խումբի կազմին մէջ հանդէս պիտի գան Ռիչըրտ Պոնան, Էթյէն Սթետուիքը, Լիւտուիք Աֆոնսոն, Լի Կրինպլատն ու Ատամ Սթոլըրը:

Սեպտեմբեր 19-ին երեկոն պիտի բանայ Հայաստանի պետական ճազ նուագախումբը (գեղ. ղեկավար` Արմէն Հիւսնունց), ինչպէս նաեւ կատարումներով հանդէս պիտի գան Մարիամ եւ Արմէն Մերաբովները (Ռուսիաա), Էռնա Եուզպաշեանը եւ Հիւպերէ Թապսը (Աւստրիա):