Հիւսիսային Իրաքի մէջ  «Քիւրտիստանի բանուորական կուսակցութեան» (ՔԲԿ-PKK) ռազմաճամբարներուն թրքական օդուժի հարուածներէն, ինչպէս նաեւ Իգտիրի մէջ թուրք-քրտական բախումներէն  յետոյ Թուրքիոյ որոշ քաղաքական գործիչներ հանդէս եկած են անհիմն եւ սադրիչ յայտարարութիւններով: Նշած են, թէ իբր Հայաստանի մէջ տեղակայուած է ՔԲԿ-ի ռազմաճամբարներէն մէկը: Նման տեսակէտ հնչեցուցած է մասնաւորապէս Թուրքիոյ «Ազգայնական շարժում» կուսակցութեան (ԱՇԿ-MHP) նախկին պատգամաւոր Սինան Օղան: Վերջինիս ձեւակերպմամբ` Հայաստան ՔԲԿ-ի համար երկրորդ Քանդիլ է: (Իրաքի մէջ գտնուող Քանդիլ շրջանին մէջ կը գտնուի ՔԲԿ-ի գլխաւոր ռազմաճամբարը):

Պէտք է նկատել, որ Օղանի յայտարարութիւնը ոչ այլ ինչ է, քան թուրք-քրտական բախումներու մէջ հայկական տարրը ներքաշելու հերթական փորձ:

Վերոնշեալ թեմայով «sputnuknews»-ի թրքական ծառայութիւնը  զրուցած է Թուրքիոյ Ազգային Մեծ Ժողովի արտաքին յարաբերութիւններու, ներքին գործերու, անվտանգութեան ու հետախուզութեան յանձնաժողովներու նախկին անդամ Ալի Հայտար Օների հետ: ermenihaber.am-ի փոխանցմամբ` զրոյցին վերջինիս հարց  ուղղուած է թէ արդեօք Թուրքիոյ եւ Հայաստանի սահմանային գիծին թրքական զինուժին կողմէ կ’իրականացուի նմանատիպ լայնածաւալ գործողութիւն: Օներ ի պատասխան ըսած է.

«Չեմ կարծեր, թէ ռազմական գործողութիւններու սահմանագիծը ընդլայնելու կարիք կայ, քանի որ իմաստ չկայ: Իշխանութիւններուն կ’ըսէին, որ Հայաստանի հետ հաշտութիւն  տեղի պիտի ունենայ, սակայն ինչպէս տեսանք, հայերը անոնց աչքերուն փոշի փչեցին:

Մենք ըստ էութեան խնդիր չունինք մեր հայ քաղաքացիներուն հետ: Հայաստանի հետ ալ խնդիր չունինք, բայց Հայաստան կը շարունակէ քէնութիւնը: Արխիւները բանալով կարելի է Հայաստանի հետ կապուած անցեալի իրադարձութիւններուն գնահատական տալ, բայց հայերը կը շարունակեն տուրք տալ կարծրատիպերուն եւ թշնամական զգացումներուն»: