“Գիտէինք սակայն մեր աչքերով տեսանք և փաստեցինք թէ, ԼՂՀ-ն հայկական հող է և Հայաստանի անբաժան մասը” յայտարարեց հայ ժողովուրդի դատի պաշտպան Ռուպէն Մարթինէս Ուէլմօ։

Առաջին անգամ ըլլալով և անսալով ՀՀ դեսպան Պր. Ալէքսան Յարութիւնեանի կոչին, Ուրուկուահայ բոլոր միութիւններու նախաձեռնութեամբ, գաղութիս Մշակութային Կեդրոնի հանդիսասրահին մէջ, ընթացք առաւ Արցախի Հանրապետութեան անկախութեան հռչակման 24-րդ տարեդարձի գեղարուեստական յայտագրով տօնախմբութիւնը։

Ձեռնարկի սկիզբը հնչեցին Ուրուկուայի և Արցախի օրհներգները, որմէ ետք “Ճանչնանք ԼՂՀ-ն” կարճ տեսահոլովակ մը ցուցադրուեցաւ, ապա գաղութիս մէջ գործող երեք պարախումբեր, Հայ Կեդրոնի Կայանէ, Մարաշի Հայրենակցական Միութեան Գերմանիկ, Համազգայինի Շիրազ, ինչպէս նաև ՀԲԸՄ-ի Կռունկ երգչախումբը, ելոյթ ունեցան տօնական մթնոլորտ ստեղծելով։

Օրուայ միակ դասախօսը, Հայ Դատի և հայ ժողովուրդի մեծ բարեկամ Ծերակուտական Ռուպէն Մարթինէս Ուէլմոն, հրաւիրուեցաւ բեմ։ Ուէլմօ ոչ միայն Արցախին քաջածանօթ քաղաքական գործիչ է այլև իր աչքերով տեսաւ մեր Արծուաբոյնը, երբ Ուրուկուայի խորհրդարանական պատուիրակութեան մը հետ, երկու տարի առաջ ճամբորդեց Արցախ և մեծ տպաւորութիւններով ինք և պատուիրակութեան միւս անդամները վերադարձան և աւելիով հաստատեցին իրենց զօրակցութիւնը Արցախի դատին։

Իր դասախօսութեան ընթացքին Ուէլմօ առանց բառերը ծամծմելու ըսաւ, թէ ինք համոզուած է որ Միջազգային Ընտանիքը ոչ հեռաւոր ապագային, ստիպուած պիտի ըլլայ նախ ճանչնալու Արցախի ժողովուրդի ինքնորոշան իրաւունքը, որմէ ետք անխուսափելի պիտի ըլլայ նաև անոր անկախութեան միջազգային ճանաչումը։

“Մենք ականատեսը եղանք և կրկին փաստեցինք թէ, Լ. Ղարաբաղը իր մշակութային հարուստ ժառագութեամբ, իր հայ բնակչութեամբ և ժողովրդավար իշխանութիւններով, ոչ միայն ներկայ Հայաստանի անբաժանելի մասն է այլև մաս կը կազմէ հայ ժողովուրդի 4000 տարուայ պատմութեան” ըսաւ ծերակուտականը և իր խօսքը աւարտեց այսպէս “Ուրուկուայը մարդու հիմնարար իրաւունքներու և ազգերու ինքնորոշման իրաւունքներուն ունի սկզբունքային մօտեցումներ և մեր երկիրը շահերէ վեր կը դասէ և հաստատ կը մնայ իր որդեգրած այդ սկզբունքներու վրայ։ Ինչպէս որ Ուրուկուայը առաջինն էր որ ճանչցաւ Հայոց Ցեղասպանութիւնը, այսօր մեր քաղաքական շրջանակներու մէջ, կը շարունակենք աշխատիլ որպէսզի միջազգային գետնի վրայ ելքեր գտնենք և ինչու չէ դերևս

 այս պարագային ալ, առաջինը ըլլանք ճանչնալու Լ.Ղարաբաղի անկախութիւնը” աւարտեց իր խօսքը ծերակուտական Ռուպէն Մարթինէս Ուէլմոն։

Կարօ Հէքիմեան