ՀՀ կրթութեան եւ գիտութեան նախարար Արմէն Աշոտեան շնորհաւորական խօսք  յղած է Գիտելիքի օրուան կապակցութեամբ: Ինչպէս կը յայտնեն ՀՀ ԿԳՆ մամլոյ ծառայութենէն, իր խօսքին մէջ նախարարը ըսած է.

«Սիրելի դպրոցականներ, ուսանողներ, մանկավարժներ, կրթութեան բնագաւառի ներկայացուցիչներ,

Շնորհաւորում եմ ձեզ Սեպտեմբերի մէկի` նոր ուսումնական տարուայ մեկնարկի եւ գիտելիքի օրուայ կապակցութեամբ:

Այս օրը յիշարժան է բոլոր աշակերտների, մասնաւորապէս, առաջին դասարանցիների համար, ովքեր իրենց ուսուցիչների ուղեկցութեամբ առաջին անգամ կը մտնեն դպրոց` զարմանահրաշ մի աշխարհ, որը տարիների ընթացքում կը դառնայ նրանց համար անչափ հոգեհարազատ, սիրելի ու անմոռանալի մի վայր, որն ամբողջ կեանքում կոչելու են «իմ դպրոցը»:

Սիրելի՛ ուսանողներ, մեկնարկում է նոր ուսումնական տարին: Կրթութեան ու գիտելիքի հանդէպ պէտք է լինէք պահանջատէր, օգտագործէք ձեր լաւագոյն տարիները` որակեալ կրթութիւն ստանալու, բարձրակարգ մասնագիտական գիտելիքներ ու հմտութիւններ ձեռք բերելու համար:

Ժամանակակից աշխարհը նոր մարտահրաւէրներ է ներկայացնում մասնագիտական կրթութեանը, եւ մեր կողմից իրականացուող  գործընթացները միտուած են մրցունակ եւ որակեալ մասնագէտների պատրաստմանը:

Վստահ եմ, որ նոր ուսումնական տարին ձեզ համար կը լինի կրթութեան եւ գիտելիքի վերաարժեւորման տարի:

Սիրելի՛ մանկավարժներ, դասախօսներ, ոլորտի ներկայացուցիչներ, կրթութեան համակարգում ներկայիս իրականացուող բարեփոխումների յաջողութիւնը պայմանաւորուած է մեր միասնական ու  հետեւողական աշխատանքով: Նոր ուսումնական տարին սկսենք աշխատանքային նոր լիցքերով ու եռանդով: Համատեղ ջանքերով կրթական համակարգը դարձնենք առաւել կատարեալ, որակեալ ու մրցունակ: Մեզանից պահանջւում է լինել  պատասխանատու եւ զգօն, քանզի մեր աշխատանքի արդիւնքը վաղուայ մեր կիրթ ու բանիմաց երիտասարդն է, մեր երկրի յենասիւնը,  մեր պետութեան զարգացման ու հզօրացման գրաւականը:

Մէկ անգամ եւս շնորհաւորելով Հայաստանի, Արցախի եւ Սփիւռքի բոլոր դպրոցականներին, ուսանողներին, մանկավարժներին, դասախօսներին, կրթութեան բնագաւառի բոլոր ներկայացուցիչներին նոր ուսումնական տարուայ մեկնարկի ու գիտելիքի օրուայ կապակցութեամբ, մաղթում եմ նորանոր յաջողութիւններ, ձեռքբերումներ եւ նուաճումներ»: