Սուրիական ուժերը օդային ուժերուն հետ միասին կանխած են «Ճապհա ան Նուսրա» ահաբեկչական խմբաւորման յարձակման փորձը Իտլիպի նահանգին մէջ գտնուող Ապու Տուհուր օդակայանին վրայ: Ինչպէս կը հաղորդէ «Արմէնփրէս»­-ը` վկայակոչելով սուրիական ՍԱՆԱ գործակալութիւնը, ռազմական գործողութիւններու արդիւնքով մեծ թիւով ահաբեկիչներ  սպաննուած են ու վիրաւորուած, ոչնչացուած են անոնց զէնքերը:

Ռազմական աղբիւրները կը տեղեկացնեն, որ Հալէպի մէջ ռազմաօդային ակադեմիոյ մերձակայքը սուրիական օդուժը մեծ վնասներ  հասցուցած է ահաբեկիչներուն, ինչպէս նաեւ անոնց պատկանող սարքաւորումներուն: Բացի այդ սուրիական օդուժը Տարաայի շրջանի Տաիլ գիւղաքաղաքին մէջ «Ճապհա ան Նուսրա»-­ի հաւաքատեղիներու ռմբակոծման արդիւնքով աւելի քան 100 ահաբեկիչներ  սպաննուած են: Արդէն երկրորդ օրն է, որ կը շարունակուի Զապատանիի զինադադարը զինուած խմբաւորումներուն եւ «Հըզպոլլահի» եւ սուրիական բանակին միջեւ:

Սուրիական բանակը աւելի քան չորս տարի անընդմէջ պայքար կը մղէ տասնեակ զինուած խմբաւորումներու դէմ` փորձելով երկրին մէջ վերականգնել կայունութիւնն ու անվտանգութիւնը:

ՄԱԿի տուեալներով` սուրիական հակամարտութեան ընթացքին զոհերու թիւը գերազանցած է 220 հազարը: