Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի օրհնութեամբ Մայր Աթոռ Սուրբ Էջմիածինի Հրատարակչական բաժինը լոյս  ընծայած է Վահրամ եպիսկոպոս Մանկունիի «Գէորգ Դ. եւ իւր ժամանակը (1812-1882)» երկը, որ նախապէս հրատարակուած էր Փարիզի մէջ «Վէմ» ամսագիրի 1933-1937 թթ. համարներուն մէջ:

Գիրքը նուիրուած է Հայոց Եկեղեցւոյ ամենանշանաւոր դէմքերէն Ամենայն Հայոց Գէորգ Դ. Կոստանդնապոլսեցի Կաթողիկոսին (1866-1882 թթ.): Ժամանակի իրադարձութիւններուն քաջատեղեակ եւ շատ յաճախ անմիջական մասնակից Վահրամ եպիսկոպոս սոյն ուսումնասիրութեամբ ոչ միայն կը ներկայացնէ Գէորգ Դ. Կաթողիկոսի ստոյգ կենսագրութիւնը, այլեւ տուեալ ժամանակաշրջանի Հայոց Եկեղեցւոյ վաւերական պատմութիւնը:

Գէորգեան հոգեւոր ճեմարանի հիմնադրման 140-ամեակին նուիրուած այս հրատարակութիւնը աշխատասիրած եւ ծանօթագրած է Գէորգեան ճեմարանի դասախօս պ.գ.թ.,  Պետրոս Հ. Յովհաննիսեան:

Գիրքը տպագրուած է «Սարգիս Գաբրիէլեան» հիմնադրամի մեկենասութեամբ: