Սեւանայ լիճի հարաւ­ արեւմտեան մասին մէջ` գողտրիկ լեռներով շրջապատուած Լիճք գիւղին մէջ տարուան 8-­9 ամիսներուն գիւղը  կ’իշխեն կանայք: Անոնք ամրակազմ, հաստատակամ կանայք են, որոնք խիզախօրէն հոգ կը տանին ոչ միայն իրենց ընտանիքներուն, այլեւ ամբողջ գիւղին մասին: ինչպէս կը փոխանցէ «Արմէնփրէս»-­ը, նման կերպ սկսած է CNN­-ը Լիճք գիւղին նուիրուած խմբագրականը:

Հայկական Լիճքին մէջ շատ աշխատասէր կանայք կան, սակայն այստեղ չես գտներ շատ տղամարդիկ: Այս կանանց ամուսինները կը գտնուին հազարաւոր մղոններ հեռու` հիմնականին  Ռուսաստանի Դաշնութեան մէջ: Հայաստանի տնտեսութեան խնդիրներու պատճառով աշխատանքային տարիքի տղամարդոց  ստուար  հատուած մը մեկնած է արտերկիր` շինարարութեամբ աշխատելու համար: Աշխատանքի հիմնական բեռը այս պայմաններուն մէջ կը մնայ կանանց ուսերուն:

«Ամէն ինչ կ’ընեն խումբերով` հողի աշխատանքէն մինչեւ անասուններ պահելը եւ լաւաշ թխելը»,­ կը գրէ CNN­-ը: Ձմրան ամիսներուն, երբ երկար բացակայութենէ յետոյ կը վերադառնան տղամարդիկ, գիւղի բնակիչներուն համար իրական տօն կը սկսի. կեանքը կը լեցուի հարսանիքներով, ծնունդներով եւ խնճոյքներով: Լրագրող Ճուլիէն Փեպրել, երկու շաբաթ բնակած է այնտեղ` լուսանկարելով ու փաստագրելով գիւղացիներու կեանքը: