Ղպտի Երիտասարդաց միութենէն մօտաւորապէս 40 անդամներ, որոնք ժամանած էին Արեւելեան ափէն, Օգոստոս 4ին այցելեցին Հիւսիսային Ամերիկայի Հայց. առաքելական եկեղեցւոյ Արտեւմտեան թեմի առաջնորդանիստ Սրբոց Ղեւոնդեանց Մայր տաճարը: Սուրբ Էնթընի Ղպտի ուղղափառ վանք վերադառնալէ առաջ, երիտասարդ ուխտաւորները փափաքած էին այցելել Արեւմտեան թեմի հոգեւոր կեդրոնը: Այս մասին կը գրէ Asbarez-ը:

Առաջնորդարանի միջեկեղեցական յարաբերութեանց ներկայացուցիչ Հայկ Մատոյեան երիտասարդները առաջնոորդեց դէպի Սրբոց Ղեւոնդեանց Մայր տաճար, ապա՝ «Զօրայեան» թանգարան:

Շրջագայութեան աւարտին, երիտասարդները հաւաքուեցան Մայր տաճարի դասը, ուր զիրենք ողջունեց թեմակալ առաջնոդ Յովնան արք. Տէրտէրեան: Իր պատգամին մէջ սրբազան հայրը ցուցաբերեց հովուական իր զօրակցութիւնն ու ուղղութիւնը երիտասարդ ուխտաւորներուն եւ գնահատեց անոնց աստուածահաճոյ մտայղացումը՝ այցելելու Հայց. եկեղեցւոյ Արեւմտեան թեմի առաջնորդարանն ու Մայր տաճարը: Երիտասարդ ուխտաւորները հոգեկան մխիթարութեամբ եւ զօրացած հաւատքով բաժնուեցան Մայր տաճարէն: