Երեւանի պետական համալսարանի պատմութեան բաժանմունքը աւարտած ուսանողները Վանի Աղթամար կղզիին մէջ վկայականներ ստանալէ առաջ գեղեցիկ անակնկալի ականատես եղան, կը յայտնէ News.am-ը:

ԵՊՀ պատմութեան բաժանմունքի տնօրէնի  եւ դէպի Արեւմտեան Հայաստան եւ Կիլիկիա զբօսաշրջութիւն կազմակերպող «Նարեկավանք Տուր» ընկերութեան կողմէ Վանի Աղթամար կղզիին մէջ կազմակերպուած էր պատմութեան բաժանմունքի շրջանաւարտներուն վկայականներ յանձնելու արարողութիւն:

Վկայականներ ստանալէ առաջ, երբ բոլորը հաւաքուած կ’ըլլան Աղթամարի սուրբ Խաչ եկեղեցւոյ մէջ, ԵՊՀ պատմութեան բաժանմուքնի շրջանաւարտ Գէորգը ամուսնութեան առաջարկութիւն կ’ընէ իր ընկերուհիին` Ռուզանային: Գէորգը NEWS.am-ի թղթակիցին հետ զրոյցին մէջ նշեց, որ նման ձեւով առաջարկութիւն ընելը իր մօտ ծագած է դէպի Արեւմտեան Հայաստան ուղեւորութենէն ընդամէնը մէկ օր առաջ: Ան շեշտեց, որ Ռուզաննան խիստ անակնկալի եկած էր, քանի որ տեղեակ չէ եղած իր մտադրութեան մասին:

Այնուհետ մէկ  այլ շրջանաւարտ 22-ամեայ Նարեկը եւս գեղեցիկ ամուսնութեան առաջարկութիւն կ’ընէ իր ընկերուհիին` Անիին, որ եւս մինչ այդ պահը տեղեակ չէ եղած այդ մասին:  Նարեկը նոյնպէս նշեց, որ երկար մտածած էր, թէ ինչ հետաքրքիր ձեւով ամուսնութեան առաջարկութիւն ընէ եւ վկայականները ստանալու համար դէպի Արեւմտեան Հայաստան ուղեւորութիւնը լաւ առիթ հանդիսացաւ: