Մուսա լերան հերոսամարտի 100-ամեակին եւ Ֆրեզնոյի Մուսա Լեռ միութեան հիմնադրութեան 30-ամեակին նուիրուած՝ Ֆրեզնոյի աւանդական տօնակատարութիւնը այս տարի տեղի պիտի ունենայ Շաբաթ, 5 եւ Կիրակի 6 Սեպտեմբերին, Ֆրեզնոյի գաւառային «Փիս Աֆիսըրզ» զբօսայգիին մէջ (7633 N. Weber Ave. Fresno, CA 93722), «Փաշայեան» ճամբարի կից: Այս մասին կը հաղորդէ ԱՄՆ-ի «Ասպարէզ» օրաթերթը։

Շաբաթ, Սեպտեմբեր 5-ին, երեկոյեան ժամը 7-էն սկսեալ տեղի պիտի ունենայ հերիսայի պատրաստութիւնը՝ տաուլ-զուռնայի ընկերակցութեամբ, երաժշտութեամբ եւ պարով յագեցած մթնոլորտի մը մէջ: Պիտի հրամցուին նաեւ հայկական ճաշեր, իսկ մթնոլորտը պիտի ճոխացնէ «ՀայՎայպ»ը։

Մատաղի նուիրատուութեանց համար, դիմել (559) 824-5585 թիւին, մինչեւ Օգոստոս 28։ Կիրակի, Սեպտեմբեր 6-ին, կ.ա. ժամը 10։30-ին պիտի մատուցուի Ս. պատարագ, ինչպէս նաեւ տեղի պիտի ունենայ հոգեհանգիստ ու մատաղի օրհնութիւն, ժամը 12-ին: Կազմակերպիչները այս տարի որոշած են Երկուշաբթի, Սեպտեմբեր 7-ին նաեւ նախաճաշ մը իրականացնել «Փիքատելի Ին Պաֆէ»ի մէջ, կ.ա. ժամը 10-ին։ Մասնակցութեան սակը 25 տոլար է։ Տեղեր ապահովելու համար դիմել՝ (559) 779-2878 կամ (559) 434-9009 թիւերուն, մինչեւ Օգոստոս 24։