Մետիա նախաձեռնութիւններու կեդրոնի մէջ Յուլիս 22–ին կայացաւ BBC-ի լրագրող Լարա Պետրոսեանի նկարահանած “Յիշելով հայկական ջարդերը” (Remembering the Armenian Massacres) վաւերագրական ֆիլմի ցուցադրութիւնը:

 news.am-ի փոխանցմամբ` ցեղասպանութեան 100–ամեակին նուիրուած ֆիլմը այս տարուան Ապրիլ 24-ին հեռարձակուած էր BBC WORLD NEWS, BBC NEWS CHANNEL, BBC PERSIAN TV հեռուստաալիքներով:  Ան նաեւ ներբեռնուած է BBC-ի թրքական ծառայութեան youtube էջի մէջ:

Ֆիլմի մէջ  Լարա Պետրոսեան կ’այցելէ Թուրքիա եւ կը փորձէ Արեւմտեան Հայաստանի նախկին հայաշատ քաղաքներու մէջ գտնել 100 տարի առաջ այստեղ ապրած հայերու հետքերը:

Լարա Պետրոսեանին կը միանայ “BBC Թուրքիա”-ի լրագրող Ռենճին Արսլանը, որուն նոյնպէս կը յուզէ այն հարցը, թէ իրականութեան մէջ ինչ կատարուած է  հարիւր տարի առաջ իր երկրի մէջ ապրող հայերու հետ: Ֆիլմի մէջ անդրադարձ կայ նաեւ իսլամացած հայերունն, ովքեր դեռ ֆիզիկական վտանգէն խուսափելու համար կը թաքցնեն, որ իրենց նախնիները հայեր են: Բացի Էսկիշէիր քաղաքէն, ուր կատարուած են ֆիլմի հիմնական նկարահանումները, լրագրողները աշխատած են նաեւ Վանի, Մուշի, Սթամպուլի եւ Արարատ լերան ստորոտին: Ֆիլմը նախապատրաստուած եւ նկարահանուած է եօթ շաբաթուան մէջ:

Ֆիլմը անգլերէն է, սակայն հեղինակը ծրագրած է ֆիլմը թարգմանել նաեւ հայերէն: