Սթամպուլի Քարթալ շրջանին մէջ գտնուող Սուրբ Նշան եկեղեցւոյ հիմնադրամի ղեկավարներու խորհուրդի անդամներն ու եկեղեցւոյ հովիւ Գրիգոր Տամատեան այցելած են Պոլսոյ հայոց պատրիարքի փոխանորդ Արամ արքեպիսկոպոս Աթէշեանին, tert.am-ի փոխանցմամբ` կը տեղեկացնէ Hye Tert-ը:

Սթամպուլի  արուարձանին մէջ գտնուող Սուրբ Նշան եկեղեցին փակուած էր 2 տարի առաջ` հայ համայնքի թիւի նուազելուն եւ վերանորոգման աշխատանքներու հետեւանքով:

Այժմ արդէն հիմնադրամի ղեկավար Յովհաննէս Սահակօղլուն եւ անոր ընկերները հաղորդած են, որ եկեղեցւոյ վերանորոգման աշխատանքները աւարտին կը մօտենան:

Հանդիպման ընթացքին որոշուած է հաւատացեալներու համար եկեղեցւոյ վերաբացումը կատարել 2015 թուականի Օգոստոս 8-ին:

Արամ Աթէշեան նշած է, որ Սուրբ Նշան եկեղեցին կարեւոր տեղ ունի հաւատացեալներու սրտերուն մէջ, եւ ողջունած է հիմնադրամի ղեկավարներն ու բարերարները` աշխատանքը աւարտին հասցնելու կապակցութեամբ: