Վերջին օրերուն Թուրքիոյ մէջ ազգայնամոլական շրջանակներու կողմէ հայ պատգամաւորներուն եւ հայ արուեստագէտներուն նկատմամբ վիրաւորական եւ ռասիստական յայտարարութիւններուն դէմ  դուրս եկած են թուրք յառաջադէմ մտաւորականները, կը գրէ Artsakhpress-ը:

Թրքական Gercekgundem կայքի փոխանցմամբ` «Անգարայի մտքի ազատութեան» նախաձեռնութեան կողմէ յայտարարութիւն  տարածուած է, որ խիստ քննադատութիւն  հնչեցուած է վերջին շրջանին «Ազգայնական շարժում» կուսակցութեան  շարք մը քաղաքապետներու կողմէ հայ պատգամաւորներուն եւ համերգներով Թուրքիա մեկնած հայ երաժիշտ Տիգրան Համասեանի հասցէին վիրաւորական ու սպառնալից յայտարարութիւններու կապակցութեամբ:

«Անգարայի մտքի ազատութեան» նախաձեռնութեան կողմէ եղած յայտարարութեան տակ ստորագրած են մօտ երկու հարիւր թուրք մտաւորական, արուեստագէտ, իրաւաբան եւ քաղաքական գործիչ:

Նշենք, որ «Ազգայնական շարժում» կուսակցութեան անդամ, Ատանայի քաղաքապետը վիրաւորած էր խորհրդարան մտած հայ պատգամաւորներուն` փորձելով խաղարկել Թուրքիոյ մէջ հասարակաց տուներու ցանցերու նախկին սեփականատէր Մաթիլտա Մանուկեանի անունը, իսկ Կարսի քաղաքապետը խիստ զայրացած էր այն հանգամանքէն, որ հայ երաժիշտը Անիի մէջ համերգով հանդէս եկած է: