«Ապրիլ» գրատունը Յուլիս ամիսը կը ձօնէ մանուկներու եւ պատանիներու, ներկայացնելով երեք երեկոներ՝ նուիրուած հայ հեղինակներու, որոնք կը գրեն հայերէն կամ անգլերէն: Ներկայացումները տեղի պիտի ունենան «Ապրիլ» գրատան մէջ (415 E. Broadway, Glendale, CA)։ Մուտքը ազատ է: Ստորեւ ձեռնարկներուն մանրամասնութիւնները.

– Կիրակի, Յուլիս 12ին, երեկոյեան ժամը 4ին, հեղինակ Ալին Պզտիկեան-Շիրաճեան պիտի ներկայացնէ իր նոր հրատարակուած մանկական գիրքը՝ «Լորիի եւ Նարեկի Անմոռուկը», իսկ ժամը 5ին, հեղինակ եւ արուեստագէտ Ռօզմերի Յարութիւնեան-Քոհըն պիտի ներկայացնէ անգլերէնով գրած իր մանկական հեքիաթը՝ «Anoush: The Daugher of King Shen»: Ունկնդիրները նաեւ առիթ պիտի ունենան ներկելու մետաքսէ շրջանակներու վրայ.

– Կիրակի, Յուլիս 19ին, երեկոյեան ժամը 4ին, Հայոց Ցեղասպանութեան վերապրողներու թոռ՝ հեղինակ Տանա Ուալրաթ, Նիւ Եորքէն, պիտի ներկայացնէ իր նոր հրատարակուած անգլերէն պատանեկան գիրքը՝ «Like Water on Stone», իսկ ժամը 5ին, հեղինակ Ֆիրա Ակեանի մանկագրական աշխարհը պիտի կենդանանայ երգ, պար, արուեստ, ու խօսքով՝ երեխաններու, տիկնիկներու եւ հեղինակի կատարմամբ.

– Կիրակի, Յուլիս 26ին, երեկոյեան ժամը 4ին, հեղինակ եւ արուեստագէտ Ճենիֆըր Սալմասեան պիտի ներկայացնէ իր մանկական գիրքը, զոր գրած է թէ՛ հայերէնով եւ թէ անգլերէնով՝ «Լուսինէն Երկնքին Մէջ»։

Իսկ ժամը 5ին, պատանի հեղինակ Վարագ Գալուստեան պիտի ներկայացնէ իր նոր հրատարակուած անգլերէն գրած արկածային վէպերու շարքի առաջին հատորը՝ «The Legend of V: Book 1: The Solar System’s Prophecies»:

Յաւելեալ տեղեկութիւններու համար հեռաձայնել «Ապրիլ» գրատուն՝ (818) 243-4112 թիւով, կամ դիմել noor@abrilbooks.com հասցէին։